–Եթե համառոտ բնութագրելու լինենք զինադադարի 15 տարիները, ապա  դրանք Ղարաբաղի պետականության կազմավորման շարունակությունն ու դինամիկ համակարգի ձևավորումն էին, որն այսօրվա դրությամբ ապացուցել է իր կենսունակությունը:

Այդ մասին հայտարարել է ԼՂՀ արտաքին գործերի նախարար Գեորգի Պետրոսյանը Լեռնային Ղարաբաղի Հանրապետության հանրային հեռուստատեսության «Վեստնիկ» հաղորդմանը տված հարցազրույցում:

–Անշուշտ ամեն ինչ չէ, որ մեր ուզածի պես կատարյալ է դասավորվում, սակայն մեզ հաջողվել է լուծել, իմ կարծիքով, ամենակարևոր խնդիրները. բանակ ենք ստեղծել, որը անվտանգության ամենահիմնական երաշխիքն է, կառուցել ենք պետական կառավարման ներքին համակարգ: Եվ այս ամենը, փաստորեն, տեղի է ունեցել պատերազմի և հետպատերազմյան զինադադարի պայմաններում, - նշել է ԼՂՀ արտաքին գերատեսչության ղեկավարը: Միաժամանակ Գեորգի Պետրոսյանը ընդգծել է, որ ղարաբաղյան կողմի համար կարգավորման անկյունաքարը Լեռնային Ղարաբաղի ապագա կարգավիճակի հարցն է: