Հեռահաղորդակցության ոլորտում առկա նվաճումները ներկայումս քաղաքական ուժերին լայն հնարավորություններ են ընձեռում համացանցի միջոցով ընտրողների հետ անմիջական կապի ապահովմամբ կազմակերպել նախընտրական ակտիվ քարոզչություն: Անհանգստացած, որ ՀՀ կուսակցությունները, մեծամասնական ընտրակարգով առաջադրված թեկնածուները բավարար չափով չեն կարողանում օգտվել այդ հնարավորություններից՝ ՀՀ Հանրային խորհրդի և «Ազգային համագործակցություն» հիմնադրամի հանրության հետ կապերի համացանցային ակումբը մշակել է առաջարկությունների փաթեթ, որը որոշ չափով կնպաստի իրավիճակի շտկմանը: Այս մասին հայտնում են Հանրային խորհրդի մամուլի ծառայությունից: 

Նախատեսվում է`

1. Նպաստավոր պայմաններ ստեղծել, որպեսզի ընտրություններին մասնակցող թեկնածուները և կուսակցությունները տեսանյութերի համացանցային ուղիղ հեռարձակմամբ կազմակերպեն հանդիպումներ ընտրողների հետ, ներկայացնեն իրենց ծրագրերը, մոտեցումները:

2. էլեկտրոնային փոստով նախապես ընտրողներին տեղեկացնելով` տեսանյութերի ուղիղ հեռարձակմամբ ակումբում կազմակերպել քննարկումներ, բանավեճեր, կլոր սեղաններ:

3. Պայմաններ ստեղծել համապատասխան կայքերում այդ բոլոր տեսանյութերի տեղադրման համար, մշակելով որոնման արդյունավետ համակարգ հնարավորություն տալ ընտրողներին իրենց հարմար ժամանակ ծանոթանալ նյութերին, թողնել իրենց դիտողություններն ու առաջարկությունները:

4. Հիմնադրամի sociology.am կայքի «Հեղինակային կարծիք» բաժնում ընտրություններին մասնակցող կուսակցությունների, նրանց ընտրական ցուցակներով առաջադրված թեկնածուներին և ընտրատարածքներում մեծամասնական ընտրակարգով առաջադրված թեկնածուներին տրամադրել անհատական էջեր, որտեղ նրանք կկարողանան տեղադրել իրենց ծրագրերը, գաղափարներն ու մոտեցումները, ինչպես նաև հնարավորություն տալ ընտրողներին այդ էջերում իրենց կարծիքը հայտնել, առաջարկություններ անել:

5. Աջակցել թեկնածուներին սոցիալական ցանցերում (Facebook, Google+, Hayland և այլն) իրենց էջերը նախընտրական քարոզչության տեսակետից արդյունավետ ձևով կազմավորելու հարցում:

6. sociology.am կայքում անցկացնել ընտրություններին մասնակցող կուսակցությունների, նրանց ընտրական ցուցակներով առաջադրված թեկնածուներին և ընտրատարածքներում մեծամասնական ընտրակարգով առաջադրված թեկնածուների վարկանիշային հարցումներ, կազմակերպել համամասնական ցուցակներում թեկնածուների հերթականության համապատասխանության գնահատման հարցումներ, ինչպես նաև ընտրությունների արդյունքների վերաբերյալ պարբերական հարցումներ: 
Ակումբը կանխավ հայտնում է նաև քննարկման ընթացքում հնչած դիտողություններն ու առաջարկությունները հնարավորինս հաշվի առնելու և մինչև պաշտոնական քարոզարշավի մեկնարկը համապատասխան շտկումներ կատարելու իր պատրաստակամությունը։

Ակումբի տնօրեն՝ Արշակ Սադոյան