Այսօր «Ազատ դեմոկրատների» համագումարից հետո այդ կուսակցության նախագահ Խաչատուր Քոքոբելյանը պատասխանել է լրագրողների հարցերին

–Համագումարում Ձեր ելույթում խոսեցիք «Ժառանգության» հետ միասնական ճանապարհ անցնելու մասին, սակայն դաշինքի մասով ոչինչ չասացիք։ Ինչո՞ւ։

–Կարծում եմ՝ շտապողականություն են դրսևորում այն քաղաքական ուժերն ու անհատները, որոնք կասկածներ են ունենում։ Քանի որ մենք հաստատակամ ենք մեր գործունեությամբ և մեր որոշումներով, կարծում եմ՝ շտապողականության կարիք չկա։

–Բայց հնարավո՞ր է, որ տեղի չունենա այդ դաշինքը։

–Չե՛մ կարծում։

–Միասնական ցուցակի հարցում տարաձայնություններ կա՞ն։

–Վստահաբար կարող եմ ասել, որ մեր քննարկումների ժամանակ նման խնդիրներ չեն եղել։ Կարող եմ պնդել, որ թե՛ «Ազատ դեմոկրատներում», թե՛ «Ժառանգությունում» հավաքված են մարդիկ, որոնք վեր են կուսակցական ցանկացած նմանատիպ դրսևորման հետ կապված ամբիցիաներից։ Մենք այն քաղաքական գործիչներն ենք, որ թե՛ մեր ապրած կյանքով, թե՛ մեր գործունեությամբ միշտ ընդունել են հավասարության և իրավահավասարության սկզբունքը թե՛ քաղաքական դաշտում, թե՛ քաղաքացիական, թե՛ անձնական։ Եվ զուտ դրանից ելնելով՝ կուզենամ, որ դուք իրավահավասարությունը չընկալեք որպես զուտ թվային կամ այլ դրսևորման ձևով հավասարություն։ Ես միայն մի ցանկություն ունեմ, մեր ընկերները նույնպես, Րաֆիի Հովհաննիսյանի հետ էլ ենք խոսել այդ մասին՝ պետք է մեր ցուցակում, բացի կուսակցական գործիչներից, ընդգրկված լինեն նաև հանրային հատվածը ներկայացնող մարդիկ, որոնք ոչ քիչ կամ ոչ պակաս ներդրում ունեն այսօրվա հասարակական կյանքում։

–Վերջնական որոշումը ե՞րբ է կայացվելու։

–Չեմ կարող դա ասել մի պարզ պատճառով. դեռ խնդիրներ կան, որոնք պետք է հստակեցնենք (նկատի ունեմ զուտ տեխնիկական, այլ ոչ թե բովանդակային խնդիրները)։

–Ո՞րն է այդ տեխնիկական խնդիրը։

–Տեխնիկական խնդիր նշանակում է բուն տեխնիկական մոտեցումը։ Զուտ քաղաքական, աշխարհաքաղաքական ընկալումների առումով որևիցե տարաձայնություն չկա, և վստահ եմ, որ չի լինի։

–Ընտրություններին Ձեր մասնակցությունը պայմանավորվա՞ծ է «Ժառանգության» հետ դաշինքով։

–Եթե մենք խոսում են երկուստեք հաստատակամության և միասնական երկարաժամկետ և բովանդակային ձևաչափի ու միասնական հանդես գալու մասին, կարծում եմ՝ այդ դեպքում ավելորդ է առանձին–առանձին գնալու հարցը քննարկելը։ Բայց ակնհայտ է, որ թե՛ «Ազատ դեմոկրատները», թե՛ «Ժառանգությունը» այն քաղաքական ուժերը չեն, որոնք խնդիր ունեին առանձին–առանձին գնալու դեպքում իրենց ծրագրերն իրականացնել։ Այսօր չէր քննարկվի այս խնդիրը, եթե մեր բանակցությունների կամ պատկերացումների հիմքում դրված չլինեին միասնական լուծելու ավելի կարևորագույն խնդիրներ և ձևավորելու նոր քաղաքական մշակույթ ՀՀ–ի քաղաքացիական և քաղաքական կյանքում։

–Կոալիցիային ինչո՞ւ չեք հրավիրել Ձեր համագումարին։

–Մենք հրավիրել ենք այն քաղաքական ուժերին, որոնք, մեր պատկերացմամբ, չեն խոչընդոտում այսօրվա ՀՀ–ի ժողովրդավարացման ընթացքը։

–Հայ ազգային կոնգրեսի բարձրագույն ղեկավարությունի՞ց ինչու որևէ մեկը համագումարին ներկա չէր։ Օրինակ՝ Լևոն Տեր–Պետրոսյանին կամ Լևոն Զուրաբյանին չէի՞ք հրավիրել, թե՞ նրանք չէին եկել։

–Մենք ընդհանրապես զերծ ենք մնում ցանկացած ձևական գործողությունից, այդ թվում՝ հրավերներից, և խոր հարգանք ունենալով հիմնադիր նախագահ Լևոն Տեր–Պետրոսյանի անձի և գործունեության հանդեպ՝ գտնում եմ, որ նրան հրավիրելը զուտ ձևական բնույթ կկրեր։ Կներե՛ք, դա իմ անձնական կարծիքն է։

Ներկայացրեց Արեգնազ Մանուկյանը