ՀՀԿ անդամ Մենուա Հարությունյանն այսօրվա ասուլիսին հայտնել է, թե Մաշտոցի այգում կրպակների կառուցման դեմ կազմակերպվող ցույցերն ավելի շատ շոու են հիշեցնում:

«Ցույցի են մասնակցում շոու բիզնեսի ներկայացուցիչները, որոնց  տված վնասները մեր երկրին իրականում շատ ավելի մեծ են բարոյական առումով: Վերջին շրջանում բարոյականության մասին խոսում են անբարոյականները: Նրանք այն մարդիկ են, որոնց երբ հեռուստատեսությամբ ցույց են տալիս, միանգամից փոխում ես հեռուստաալիքը, որպեսզի երեխադ չլսի ու նրանց չընդօրինակի»,-ասել է Մ. Հարությունյանը։

Նույն ասուլիսն մասնակցող ԱԺ «Ժառանգություն» խմբակցության պատգամավոր Արմեն Մարտիրոսյանը հակադարձելով  Հարությունյանին`  նշեց, որ ինքը ևս մասնակցում է ցույցին, սակայն դրանով որևէ քաղաքական նպատակ չի հետապնդում։

«Միանշանակ է, որ մենք այստեղ խնդիր ունենք, և քաղաքապետարանը պետք է լսի բնապահպանների ձայնը: Նույնիսկ քաղաքաշինական նորմերով շինարարությունը պետք է ծառից 5մ հեռու լինի: Սա քաղաքական պայքար չէ, այլ մաքուր բնապահպանական պայքար, և  բնական է թե՛ դերասանների, թե՛ բնապահպանների մտահոգությունը: Պարզապես Հայաստանում քաղաքացիական հասարակություն է ձևավորվում, որը պայքարում է երկրի համար»,–ասել է բանախոսը։