«Ուրբաթ» ակումբում անդրադառնալով ԵԱՀԿ ՄԽ ամերիկացի համանախագահ Մեթյու Բրայզայի այն հայտարարությանը, թե Ղարաբաղն ու մնացած տարածքները քայլ առ քայլ վերադարձվելու են Ադրբեջանին, «Ակունք» վերլուծական կենտրոնի տնօրեն Ռուբեն Հակոբյանն ասել է.

-Բրայզան միշտ որևէ բանակցային գործընթացի որևէ պահից հետո ինչ-որ բան է հայտարարում, այնուհետև հայաստանյան քաղաքական շրջանակներում մեծ իրարանցում է սկսվում, հաջորդ օրը Բրայզան հերքում է իր հայտարարությունը, մյուս օրն էլ հերքում է նախորդ օրվա իր հերքածը։ Սակայն այն, ինչ Բրայզան սկզբից է ասում, դա է ճիշտը։ Ի վերջո, բանակցային գործընթացում հստակ դրված է 7 շրջանների հարցը։ Թե ե՞րբ և ինչպե՞ս պետք է այդ շրջանները վերադարձվեն, սա է հարցը։

Բանախոսի կարծիքով՝ հենց այս հարցում է, որ Թուրքիայի և Ադրբեջանի մարտավարության միջև հակասություն է առաջանում.

-Թուրքիան ցանկանում է այս գործընթացն սկսել և հնարավորինս շուտ ավարտել՝ ղարաբաղյան հարցի լուծումը զուգահեռելով հայ-թուրքական հարաբերությունների հետ, իսկ Ադրբեջանը ցանկանում է այն հնարավորինս ձգձգել՝ նկատի ունենալով, որ ևս 10 տարի, և Հայաստանը չի կարողանա դիմակայել։ Եթե Ադրբեջանը ցանկանում է Ղարաբաղյան հարցը փաթեթով լուծել, ապա Թուրքիան գտնում է, որ այն պետք է լուծվի փուլ առ փուլ, և այդ առումով բանակցային սեղանի շուրջ խնդրի արագ լուծումը Հայաստանին ևս ձեռնտու է։