Այսօր Հայաստանի քաղաքագետների միությունում տեղի ունեցած քննարկման ժամանակ անդրադառնալով համամասնական–մեծամասնական ընտրակարգերի շուրջը ծավալվող բանավեճին՝ ԲՀԿ խորհրդարանական խմբակցության քարտուղար Արամ Սաֆարյանն ասել է, թե 4 ամիս առաջ՝ ընտրական օրենսգրքի մշակման և ընդունման ժամանակ, այս հարցը հրատապ չէր դրված, իսկ այժմ այն ունի հասարակական լայն հնչեղություն, և այդ իսկ պատճառով ԲՀԿ–ն իր ստորագրությունն է դրել ԱԺ–ում լսումներ կազմակերպելու առաջարկի տակ։ Բանախոսը նշել է, որ «Բարգավաճ Հայաստան» կուսակցության ծրագիրը դրույթ է պարունակում ամբողջությամբ համամասնական ընտրակարգին անցում կատարելու վերաբերյալ՝ հավելելով, որ ԲՀԿ խմբակցությունն ու քաղաքական խորհուրդը այս հարցի կապակցությամբ դեռևս քննարկում չեն իրականացրել։ Այն կարող է մշակվել ու հնչեցվել փետրվարի 16–ին կայանալիք խորհրդարանական լսումների ընթացքում, որտեղ քննարկվելու է ամբողջապես համամասնական ընտրակարգին անցում կատարելու հարցը։

Արամ Սաֆարյանը նկատել է, որ 100%–անոց համամասնական ընտրակարգին անցումը տևական գործընթաց է, ինչը կարելի է իրականացնել փուլերով՝ սկզբում մեծամասնական տեղերի թիվը կրճատել և հասցնել, օրինակ, 15–ի կամ 21–ի։ Նրա համոզմամբ՝ այն ավելի կմեծացնի մեծամասնական ընտրակարգով ընտրված պատգամավորների պատասխանատվությունը։

7or.am