Իտալիայի վարչապետ Մարիո Մոնտիին Փարիզում «Տարվա եվրոպացի» կոչում են պարգևել։ Հանդիսավոր արարողությունը տեղի է ունեցել երեքշաբթի երեկոյան Ֆրանսիայի խորհրդարանի ստորին պալատում։

«Իտալիան դեռևս այն իրավիճակում է, որ կարող է լուրջ խնդիր ներկայացնել Եվրոպայի և եվարգոտու համար։ Սակայն մենք ամեն ինչ անում ենք, որպեսզի այդ խնդիրները չխորանան»,–հայտարարել է Մոնտին, ով իր պարգևը նվիրել է բոլոր իտալացիներին։

Այդ հեղինակավոր մրցանակը հանձնում է ֆրանսիական «Տրոմբինոսկոպե» հրատարակչությունը, որի  հայացքը քաղաքականությանն է ուղղված։ Ամենամյա գիրքը, որը հրատարակվում է 1981թ., ընդգրկում է հայտնի քաղաքական գործիչների կենսագրությունները և գլխավոր քաղաքական իրադարձությունների գնահատականները։

Ավելի վաղ այս տիտղոսին են արժանացել նաև Ֆրանսիայի նախագահ Նիկոլա Սարկոզին, ԳԴՀ կանցլեր Անգելա Մերկելը, ինչպես նաև Եվրոպական բանկի նախկին ղեկավար Ժան–Կլոդ Տրիշեն։