Պատասխանելով «Эхо Москвы»  ռադիոկայանի ղարաբաղյան հակամարտության կարգավորմանն առնչվող հարցին ԵԱՀԿ Մինսկի խմբի ամերիկացի համանախագահ Մեթյու Բրայզան մասնավորապես ասել է. «Կարծում եմ, որ վերջ ի վերջո Ադրբեջանին վերադարձվելու են տարածքները, վերադառնալու են նաև ադրբեջանցի փախստականները։ Այս պահին չեմ կարող ասել, թե ի՞նչ կլինի Ղարաբաղի հետ։ Այն պետք է ունենա նոր կարգավիճակ։ Թե ինչպիսի՞, այս հարցի շուրջ ընթանում են բանակցություններ»։

Լեռնային Ղարաբաղի կարգավիճակի որոշումը, ըստ Բրայզայի, բավականին բարդ հարց է։ Ամերիկացի համանախագահն ընդգծել է Մոսկվայում Ադրբեջանի նախագահի արած այն հայտարարությունը, թե Ղարաբաղը ցամաքային կապ է ունենալու Հայաստանի հետ։ Ինչ վերաբերում է ազատագրված տարածքներին, ապա ըստ Բրայզայի դրանք «քայլ առ քայլ՝ փախստականների հետ միասին, վերադարձվելու են Ադրբեջանին»։ Ընդ որոում Ղարաբաղի կարգավիճակը լինելու է ինքնավարության սկզբունքով։ Լրագրողի՝  «ինքնավարությու՞ն, թե՞ ինքնորոշում» ճշգրտող հարցին՝ Բրայազան պատասխանել է՝ «ինքնավարություն»։