Բրազիլիայի հավաքականի և Մադրիդի «Ռեալ»-ի նախկին ֆուտբոլիստ Ռոբերտո Կառլոսը, ով այժմ հանդես է գալիս Մախաչկալայի «Անժի»–ում, համեմատել է «Արքայական ակումբի» և կատալոնական «Բարսելոնա»–ի գլխավոր մարզիչներ Ժոզե Մոուրինյոյին և Պեպ Գվարդիոլային:

«Մոուրինյոն մնում է աշխարհի լավագույն մարզիչը: Նա առաջինն է իր բնավորության համար, իր թիմի խաղաոճի և նրա, որ նրա գլխավորած թիմերը հաղթում են: Տեսնենք՝ կհաղթի՞ արդյոք Գվարդիոլան, եթե տեղափոխվի «Չելսի» կամ «Ինտեր», միայն դրանից հետո կարող ենք ասել՝ ով է լավագույնը»– ասել է Կառլոսը։

Այնուամենայնիվ, ֆուտբոլիստն ավելացրել է.

«Պեպը ժամանակակից մարզիչ է, խելացի, համարձակ, նա սիրում է ֆուտբոլը և միշտ իր ֆուտբոլիստների կողքին է։ Նա լավ գիտի խաղը, բայց Մոուրինյոն հաջողության է հասել բոլոր երկրներում, որտեղ աշխատել է, այդ պատճառով էլ նա լավագույնն է: Այս պահին Իսպանիայում են աշխատում աշխարհի երկու լավագույն մարզիչները»,– Ռոբերտո Կառլոսի խոսքերն է մեջբերում իսպանական «Marca»-ն: