Ինչպես արդեն տեղեկացրել էինք, Թուրքիայի վարչապետ Ռեջեփ Թայիփ Էրդողանը, դիմելով Հայաստանի իշխանություններին, հայտարարել էր, թե «գրավյալ» հողերը Ադրբեջանին վերադարձնելու դեպքում միայն իրենք կբացեն սահմանը։

«7 օր»-ի հետ զրույցում, խոսելով Թուրքիայի վարչապետի այս հայտարարության մասին, «Ժառանգություն» կուսակցության մամլո խոսնակ Հովսեփ Խուրշուդյանն  ասել է, թե  Էրդողանի կողմից նման հայտարարությունները տարօրինակ է համարում։

-Սա մեզ հուշում է, որ հայ-թուրքական հարաբերությունների բարելավման հարցում Թուրքիայի կողմից անկեղծություն  չկա,-ասել է նա։ Հովսեփ Խուրշուդյանը նշել է, որ Թուրքիայի և Հայաստանի իշխանությունների հայտարարությունների միջև եղած տարբերություններից չի զարմանում։

-Մինչ այժմ Հայաստանը Թուրքիայի վարչապետի հայտարարություններին  համապատասխան արձագանքներ այդպես էլ չտվեց։ Սկսած Էրդողանի՝ Հայաստանին ագրեսոր ճանաչելու մասին հայտարարություններից,  վերջացրած «Սաբահ» թերթում ճանապարհային քարտեզի մասին ինֆորմացիայի արտահոսքով,-ասել է նա։ «7 օր»-ի հարցին, թե արդյոք դա նշանակո՞ւմ է, որ Թուրքիայի հետ առանց նախապայմանների հարաբերություններ հաստատելու մասին Հայաստանի իշխանությունների պնդումները կասակծելի են, Հովսեփ Խուրշուդյանը պատասխանել է.

-Այն, որ Հայաստանի իշխանությունները չեն բացում շրջանակային պայմանները՝  համաձայնագիրը, ճանապարհային քարտեզը, արդեն լուրջ կասկածների տեղիք է տալիս,-ասել է նա։