Պետական եկամուտների կոմիտեի և ոստիկանության աշխատակիցների համատեղ միջոցառման արդյունքում 2012թ. հունվարի 20-ին հայտնաբերվել և կանխվել է կեղծված օղի և կոնյակ իրացնելու հերթական խոշոր դեպքը: Կեղծարարների համար գայթակղիչ այս բիզնեսը մշտապես գտնվում է ՊԵԿ տեսադաշտում: Խոշոր հարկ վճարողների հարկային տեսչության աշխատակիցները, ստանալով հերթական ահազանգը կեղծիքի խոշոր խմբաքանակի վերաբերյալ, օպերատիվ հետախուզության և հետաքննության վարչությունների աշխատակիցների հետ համատեղ մեկնել են դեպքի վայր: Արսեն Անտոնյանի և Հայկ Առաքելյանի կողմից առանձնակի խոշոր չափի կեղծ օղու և կոնյակի իրացումը կանխվել է Երևանի Իսակովի պողոտայում` դեպի Մալաթիա-Սեբաստիա համայնք տանող կամրջի վրա: Պարզվել է, որ հայտնի սուպերմարկետներից մեկի մենեջեր Արսեն Անտոնյանը և տարադրամի փոխանակման կետի անվտանգությունն ապահովող  ոստիկան Հայկ Առաքելյանը, նախապես համաձայնության գալով ոմն Սամվելի հետ, վերջինիցս վերավաճառելու և վաճառքից միջնորդավճար ստանալու նպատակով  ձեռք են բերել տարբեր տարողությամբ կեղծված` հայտնի ապրանքանիշի օղու պիտակներով 60 շիշ, ինչպես նաև «Ախթամար»  և «Նաիրի» կոնյակների պիտակներով 16 շիշ: