Լրագրողների հետ հանդիպման ժամանակ Հայաստանի մարքսիստական կուսակցության նախագահ Դավիթ Հակոբյանը հայտարարել է, որ առաջիկա ընտրություններին թեկնածուները պետք է սկզբունքորեն նոր Սահմանադրության ստեղծման մասին խոսեն։

–Հատկապես տնտեսական բլոկի առումով, որը նախորդ Սահմանադրության մեջ բացառապես չկա: Սահմանադրությունից ածանցվող սկզբունքորեն նոր ընտրական իրավունք, որը պետք է ապահովի իշխանափոխության ժամանակ քաղաքացու ֆիզիկական անվտանգությունը և պաշտպանի իշխանագողությունից: Պետական մեքենայի ռեստրուկցիա: Այսօր պետության բյուջեն նստած է միայն հարկահանության վրա: Նոր աշխարհաքաղաքական հայեցակարգի մշակում (խոսքը վերաբերում է արցախյան հարցի լուծման նոր դոկտրինային), նոր ագրարարային քաղաքականություն, տնտեսական քաղաքականություն, որի տակ հասկանում ենք երեք ենթակետ՝ նոր շուկայի ձևավորում, շուկան ձևավորել ոչ միայն մեկ, այլ երեք ձևերի մասնակցությամբ: Պետությունը սեփականազուրկ է: Պետական վերահսկողություն և կարգավորում տնտեսության նկատմամբ: Նոր կրթական դոկտրինա, որ  ավելի շատ պետք է մանկավարժական սկզբունքներն ամրագրի։ Նոր օրենք կրոնի և կուսակցության մասին: Այսօր ունենք 70 կուսակցական աղանդ և 50 կրոնական աղանդ։ Կուսակցական ռեֆորմ՝ յոթանասուն կուսակցությունները գրանցել ըստ գաղափարախոսությունների,–ասել է նա:

Դավիթ Հակոբյանը նշել է, որ ինքը երեկ կոչ է արել ՀՀ նախագահին լինել իր բարձրության վրա և իշխանագողությամբ չհրապուրվել։

–Տնտղելով ՀՀԿ–ի ողջ կադրային ռեզերվը՝ տեսնում եմ, որ այնտեղ լուրջ մարդ չկա,–ասել է նա։

Անդրադառնալով Սերժ Սարգսյանի հայտարարած երիտասարդ խորհրդարան ձևավորելու գաղափարին՝ Դավիթ Հակոբյանը նշել է, որ խորհրդարանում 35–65 տարեկան մարդիկ պետք է հավաքվեն։

–Մինչև բարձրագույն ավարտած մասնագետը 10 տարի մասնագիտական գործունեությամբ չզբաղվի, պետք է արգելել նրան քաղաքական շեմը կոխել։ Սենատ ի՞նչ է նշանակում՝ ծերակույտ, սպիտակ ալեհերների  ժողով։ Ժողովրդի  հետ չաշխատած այդ, այսպես կոչված,  երիտասարդական արիստոկրատիան՝ պորտաբույծ  արիստոկրատիան... «это ничего хорошего не даст»։ Գիտեմ՝ ում մասին է խոսքը։ Այնտեղ մի այդպիսի երիտասարդական թև կա՝ կեսը բազե, կեսը՝ և այլն, բայց դա ոչ մի լավ բանի չի բերի,–ընդգծել է նա։

7or.am