2012թ. Հունվարի 28-ը Հայոց բանակի օրն է: Այդ օրը նաև լրանում է ջավախքահայ քաղաքական գործիչ, քաղբանտարկյալ Վահագն Չախալյանի որդու ծննդյան 5-րդ տարին: Տարածելու խնդրանքով «Երկիր» միությանն է փոխանցվել Վահագն Չախալյանի հետևյալ ուղերձը:

Շնորհավորում եմ իմ որդի՝ Ռուբեն Չախալյանի հնգամյա ու Հայկական բանակի 20-ամյա հոբելյանները: Հավատացած եմ, որ նորօրյա պատմության Հունվարի 28-ը մեր պետության, Հայկական լեռնաշխարհի, աշխարհասփյուռ հայության ապագա հազարաբյուր տարիների ստեղծարար ու խաղաղ գոյապահպանման գրավականն է:

2012թ. հունվարի 27,

Ռուսթավի համար 6 խիստ ռեժիմի գաղութ, Վրաստան

Վահագն Չախալյանի գործի մասին

Ջավախքահայ քաղաքական գործիչ Վահագն Չախալյանը 2008թ. հուլիսի 21-ին ձերբակալվել և 2009թ. ապրիլի 7-ին պատիժների գումարման սկզբունքի կիրառմամբ 10 տարվա ազատազրկման է դատապարտվել վրացական դատարանի կողմից մի շարք շինծու մեղադրանքների հիման վրա: Էական խախտումներով ուղեկցվող դատավարության արդյունքում ջավախքահայ գործիչը մեղավոր է ճանաչվել «հանրային կարգը խախտող զանգվածային միջոցառումների կազմակերպման և ակտիվ մասնակցության», «իշխանության ներկայացուցչի դեմ խուլիգանության» և «զենք-զինամթերքի պահպանման» համար: Մեղադրանքները հիմնված են 2005-06թթ. ի պաշտպանություն ջավախքահայության իրավունքների Չախալյանի քաղաքական գործունեությանն առնչվող փաստերի կողմնակալ ու խեղաթյուրված ներկայացման վրա:

Վահագն Չախալյանի նկատմամբ վրացական իշխանությունների հաշվեհարդարը հասարակական լայն հնչեղություն է ստացել Հայաստանում և սփյուռքում: 2009-11թթ. մի շարք հայկական և սփյուռքյան ոչ-կառավարական կազմակերպություններ հայտարարություններ են ընդունել և այլ քայլեր ձեռնարկել ի պաշտպանություն ջավախքահայ գործչի: Չախալյանի նկատմամբ անարդար դատավճռի դեմ բողոքի ակցիաներ են անցկացվել Փարիզում, Լիոնում և Երևանում:

Վահագն Չախալյանը վրաց իշխանությունների դեմ բողոք է ներկայացրել Մարդու իրավունքների եվրոպական դատարան: Բողոքի քննությունը ներկայումս ընթացքի մեջ է: