Այսօր Լատվիայում կայացած մամլո ասուլիսի ժամանակ ՀՀ արտգործնախարար Էդվարդ Նալբանդյանը հայտարարել է, որ Հայոց ցեղասպանության ժխտումը քրեականացնող օրինագիծը կարևոր մեխանիզմ է մարդկության դեմ հանցագործությունների կանխարգելման գործում: Այս մասին հաղորդում է «Ֆրանս պրես» գործակալությունը:

«Այդ կարևոր քայլը Ֆրանսիայի կողմից ոչ միայն ողջունելի է, այլև պետք է օժանդակություն ստանա Եվրոպայի և ամբողջ աշխարհի երկրների կողմից»,- հայտարարել է Նալբանդյանը:

Նալբանդյանը հույս է հայտնել, որ Թուրքիան նույնպես մի օր կճանաչի Հայոց ցեղասպանությունը.

«Մենք իսկապես հուսով ենք, որ  կգա այն օրը, երբ Թուրքիան ինքը կճանաչի Հայոց ցեղասպանությունը»:

Իր հերթին Լատվիայի ԱԳ նախարար Էդգարս Ռինկևիչսը նշել է, որ Հայաստանի և Լատվիայի ծանր պատմության մեջ նմանություններ կան և «տվյալ հարցում մենք հասկանում ենք հայ ազգի ցավը»: Հիշեցնենք, որ Հայաստանի ԱԳ նախարար Էդվարդ Նալբանդյանը հունվարի 25-ին և 26-ին գտնվելու է  Լատվիայում և Լիտվայում: