Հայաստանում ԱՊՀ երկրների ինստիտուտի տնօրեն Ալեքսանդր Մարկարովն այսօրվա ասուլիսին, խոսելով Ֆրանսիայի Սենատի կողմից Հայոց ցեղասպանության ժխտումը քրեականացնելու բանաձևի մասին, ասել է, որ Եվրոպայում ցեղասպանությունների ժխտումը քրեականացնելու որոշումները սկիզբ է դրվել շատ շուտ, և Ֆրանսիան շարունակեց եվրոպական երկրների այդ տրամաբանությունը։ Նա հույս է հայտնել, որ Եվրոպական մյուս երկրներում էլ հնարավոր է նմանատիպ որոշումներ ընդունվեն։

Բանախոսն անդրադարձ է կատարել այն հարցերին, թե արդյոք այս բանաձևի ընդունումը հակասում է Ֆրանսիայի Սահմանադրությանը և մարդու ազատ խոսքի իրավունքին։

Առաջին հարցի վերաբերյալ Մարկարովը բերել է այն փաստարկը, որ ցեղասպանության ժխտումը խտրական քաղաքականության քարոզում է։ Իսկ երկրորդ հարցի վերաբերյալ նա նշել է.

–Չպետք է մոռանալ, որ Թուրքիայում կա 301 հոդվածը, որով չի թույլատրվում խոսել հայերի ցեղասպանության մասին։

Բանախոսը համոզված է, որ բանաձևի ընդունումն ակտիվացնելու է Սփյուռքի գործողությունները ոչ միայն Եվրոպայում, այլ նաև նրա սահմաններից դուրս՝ մասնավորապես ԱՄՆ–ում։

Ա. Մարկարովի խոսքերով՝ Սենատի որոշումը իր մեջ պարունակում է թե՛ պատմական, թե՛ իրավաբանական, թե՛ բարոյական մասեր։

7or.am