Հունվարի 26-ի գիշերը USS Abraham Lincoln ավիակիրը հատեց Արաբական ծովը և մտավ ԱՄՆ Կենտրոնական հրամանատարության (CENTCOM) պատասխանատվության գոտի, որը պատասխանատու է Իրանի դեմ գործողության համար: ԱՄՆ ռազմածովային ուժերը հայտարարեցին Պարսից ծոցում զորավարժությունների մեկնարկի մասին: Նրանք նմանատիպ զորավարժություններ անցկացրեցին Վենեսուելայում՝ Մադուրոյի առևանգման նախօրեին:

Միաժամանակ, հաղորդագրություններ տարածվեցին, որ Իրանը օդ է բարձրացրել 10 կործանիչ, իսկ երկրի հակաօդային պաշտպանությունը բերվել է բարձր պատրաստվածության վիճակի։

«Աբրահամ Լինքոլն» ավիակիրը ԱՄՆ ռազմածովային ուժերի ամենամեծ և ամենահզոր նավերից մեկն է, որը կարող է տեղափոխել մինչև 80 մարտական ​​ինքնաթիռ (F-35C, F/A-18) և աջակցել հեռահար օդային գործողություններին։

Բացի այդ, ԱՄՆ ռազմաօդային ուժերը տարածաշրջանում են տեղակայել 37 F-15E Strike Eagles, մոտավորապես 20 KC-135 լիցքավորիչ օդանավ և 24 A-10C հարձակողական ինքնաթիռ՝ ստեղծելով ենթակառուցվածքներ բազմաթիվ ավիահարվածների և շարունակական օդային աջակցության համար։

Ամերիկյան ավիակիրների խումբը արագացրել է իր անցումը ԱՄՆ Կենտրոնական հրամանատարության պատասխանատվության գոտի՝ ձևացնելով, թե պատրաստ է կատարել հրամանատարական առաքելություններ ամեն կերպ՝ ուժի ցուցադրումից մինչև ինքնաթիռների և հրթիռների անմիջական օգտագործում, գրում է Special Eurasia-ն։ Կարելի է միայն կռահել. ամերիկացիները պարզապես ուժի ցուցադրո՞ւմ կանեն Իրանի ափերի մոտ, թե՞ կորոշեն հարձակվել երկրի վրա։

ԱՄՆ նախագահը նշում է, որ ներկայիս միջոցառումները նպատակ չունեն սրելու իրավիճակը, այլ, ցուցադրելու Թեհրանի կողմից հնարավոր ագրեսիվ գործողություններին արձագանքելու պատրաստականություն, հաղորդում է Reuters-ը:

Թրամփը նմանատիպ բաներ էր ասել նաև անցյալ տարի՝ Իրանին հարվածելուց և Վենեսուելայում ռազմական միջամտությունից առաջ, որը ենթադրում էր Delta Force հատուկ նշանակության ուժերի օգտագործում՝ նախագահ Մադուրոյին առևանգելու համար:

Այնուամենայնիվ, ռազմական վերլուծաբաններն արդեն քննարկում են, թե ինչ կարող է ենթադրել Իրանին հարվածելը։

Առաջին սցենարը՝ ուղիղ ավիահարվածներ հիմնական ռազմական թիրախներին՝ ավիաբազաներին, ՀՕՊ դիրքերին, Իսլամական հեղափոխության պահապանների կորպուսի (ԻՀՊԿ) բազաներին և բալիստիկ հրթիռների ենթակառուցվածքներին։

Երկրորդ սցենարը՝ հարվածներ երկրից դուրս գտնվող իրանական ազդեցության կառույցներին, այդ թվում՝ Իրաքում և Սիրիայում գտնվող հուսիթներին և շիա աշխարհազորայիններին։ Տեղակայված լիցքավորիչներն ու ռազմավարական ռմբակոծիչները թույլ կտան հարվածներ հասցնել Պարսից ծոցից զգալի հեռավորությունների վրա գտնվող թիրախներին։

Special Eurasia -ի փորձագետները նշում են, որ հարվածների մասշտաբը և բնույթը կախված կլինեն ոչ միայն ամերիկյան կարողություններից, այլև իրանական հնարավոր պատասխանի գնահատականից և միջազգային արձագանքից: Թեհրանն արդեն զգուշացրել է, որ ցանկացած հարձակում կհամարի «լիամասշտաբ պատերազմ» և պատրաստ է արձագանքել հնարավորինս կոշտ ձևով՝ ներառյալ հակահրթիռային և ռազմածովային գործողություններ: Իրանի զինված ուժերը նաև հայտարարել են ամերիկյան ավիակիրը խորտակելու փորձի մասին:

Ինչպես նշում է վերլուծաբան Ջեյմս Թաունը, «լայնածավալ գործողությունը քիչ հավանական է առանց հստակ քաղաքական նպատակների, սակայն ԱՄՆ-ն ունի ուժ արագորեն կիրառելու ռեսուրսներ»։

Պեկինում համոզված են որ Իրանին թիրախավորելով իրականում թիրախավորում են Չինաստանին

Չինաստանը վստահ է, որ Իրանի վրա հարձակումը պարզապես խորամանկություն է, և իրական թիրախը Չինաստանն է, նշում է չինական Sohu պարբերականը:

Իրանի ռազմավարական արժեքը Միացյալ Նահանգների համար կայանում է Չինաստանի հետ խորը տնտեսական կապերի մեջ։ Չինաստանը իրանական հում նավթի ամենամեծ գնորդն է։ Երկու երկրների միջև էներգետիկ համագործակցությունը Մերձավոր Արևելքում հիմնական հենակետն է։ Թրամփի կողմից Իրանի վրա գործադրվող արտակարգ ճնշումը, ըստ էության, Չինաստանի էներգետիկ անվտանգության շրջանցում է։ Երբ իրանական նավթի արտահանումը դադարեցվեց պատժամիջոցների պատճառով, Չինաստանը բախվեց մատակարարման շղթայի անկայունության և նավթի գների ռիսկերի։ Միևնույն ժամանակ, Միացյալ Նահանգները օգտվեց առիթից և պատժամիջոցներ կիրառեց Իրանի հետ առևտուր անող բոլոր ընկերությունների նկատմամբ՝ ուղղակիորեն թիրախավորելով չին-իրանական համագործակցությունը տնտեսական և առևտրային նախագծերի շուրջ, նշում է պարբերականը:

Պարբերականը նաև մեջբերում է չինական պաշտոնական աղբյուրների այն տեսակետը, թե Ամերիկայի համար Մերձավոր Արևելքը Չինաստանին զսպելու գլխավոր մարտադաշտն է:

Այս վարկածը հիմնավորվում է նաև այն հանգամանքով, որ Իրանում բողոքի ալիքն արդեն ավարտվել է, և ԱՄՆ-ի կողմից մկանների ցուցադրումը չի կարող կապ ունենալ Իրանի ներքին խնդիրների հետ:

Թեև մի շարք իսրայելական և ադրբեջանական պարբերականներ փորձում են կրակի վրա յուղ լցնել, նշելով, թե իբր Իրանում զոհերի թիվը հասնում է 30 հազարի, փորձելով խաղալ Թրամփի ինքնասիրության վրա, ով նշել էր, թե Իրանում մահապատիժների չեղարկման պատճառով հիմք չի տեսնում Իրանի հանդեպ լրացուցիչ քայլերի դիմելու համար:

Եվ ահա, 30 հազար զոհերի առասպելի տարածումը, հավանաբար, նպատակ ունի ճնշելու Թրամփի վրա, որպեսզի վերջինս ստիպված լինի հարվածել Իրանին, որի գլխավոր շահառուները, կուզենային լինել, առաջին հերթին, Իսրայելն ու Ադրբեջանը:

Սա է իրականությունը:

Արտակ Հակոբյան
Աղբյուրը՝ Zham.am