«Քաղծառայողների բան ու գործը շաբաթ, կիրակի օրով երկրի քաղաքական ղեկավարության «տուսովկաներին» մասնակցելը չէ, այդ մարդիկ իրենց ժամանակը պետք է նվիրեն իրենց ընտանիքին, հանգստին, ժամանցին: Ակնհայտ է՝ ոչ մեկի ուշքը չի գնում՝ շաբաթ օրով գնա ինչ-որ մեկի դատարկ բաժակաճառերը լսելու: Այս միջոցառումը ընտրողների կամքին բռնանալու, քաղծառայողներին քաղաքական ռեսուրս դարձնելու բացահայտ արշավ է»,-Aysor.am-ին ասաց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը՝ անդրադառնալով Մարզահամերգային համալիրում Փաշինյանի անցկացրած հավաքին՝ պետական աշխատողների համաժողովին, որի ժամանակ, ինչպես Հանրային ծառայությունները կարգավորող հանձնաժողովի նախագահն էր ասել, նախատեսված են երաժշտական համարներ, Փաշինյանի ելույթն ու պանելային քննարկումներ:

Ըստ Մանուկ Սուքիասյանի՝ երբ տարիներ առաջ քաղծառայողների համակարգն էր ներդրվում, հայտարարում էին, որ ոչ մի պետական աշխատակից, չինովնիկ քաղաքական ընթացիկ կառավարող ուժի քմահաճույքներից կախում չի ունենալու.

«Հիմա Նիկոլ Փաշինյանն իր այս քայլով բռնաբարում է քաղծառայության համակարգի փիլիսոփայությունը: Մարդկանց կամավոր-պարտադիր տարբերակով այնտեղ տանելը ընտրակեղծարարության նորագույն դրսևորում է: Ակնհայտ է՝ նպատակ ունի առաջիկա ընտրական գործընթացներում ներգրավել և ուղղորդել դեպի ՔՊ ու ծառայեցնել: Այս տեմպերով, որ շարունակվի՝ երաժշտական համարներ, պանելային քննարկում, վաղը, մյուս օրը այդ մարդկանց կհավաքեն, կհարցնեն՝ ձեր տանն ի՞նչ կա՝ նշանդրեք, ծնունդ, եկեք էդ էլ մենք էլ կազմակերպենք»:

Սուքիասյանի համոզմամբ՝ հետագայում՝ իշխանափոխությունից հետո, իրավապահները կհետաքննեն, թե ինչ հիմունքներով, ինչ գործիքակազմով, ում միջոցով են պետական ծառայողները «բերման ենթարկվել»: