Ակնհայտ է, որ քաղաքական հետապնդման են ենթարկվում այս իշխանության բոլոր ընդդիմախոսները։ Բայց դե իրենք իրենց նպատակին չեն հասնելու և ավարտելու են մյուս բռնապետերի նման։ Շատ հեռուն չգնանք՝ հարևան Վրաստանի տխրահռչակ նախագահ Սահակաշվիլին զորօրինակ։ Այս մասին ի պաշտպանություն քաղբանտարկյալների ՀՀ գլխավոր դատախազության դիմաց «Մայր Հայաստանի» ակցիայի ժամանակ հայտարարել է «Մայր Հայաստան» կուսակցության վարչության անդամ Արեգնազ Մանուկյանը։

«Ակնհայտ է նաև, որ այս իշխանությունները կապ չունեն ժողովրդավարության հետ, և ժողովրդավարության բաստիոնի իրենց այդ թեզը հերթական կեղծ փուչիկն էր, որը պայթեց, ինչպես պայթեցին իրենց մյուս բոլոր խոստումները։ Բայց դե սրանց հետ ամեն ինչ պարզ է։

Ինձ այստեղ ավելի շատ հետաքրքրում է, թե ո՞ւր են իբրև թե ժողովրդավարության և մարդու իրավունքների պաշտպան միջազգային կառույցները։ Ինչո՞ւ են խտրական մոտեցում ցուցաբերում։ Ինչո՞ւ են դառնում խուլ և համր, երբ խոսքը վերաբերում է Նիկոլ Փաշինյանի ապօրինություններին և բռնաճնշումներին։ Ո՞ւր են այն տնաբույծ իրավապաշտպանները, որոնք ճտիկով միանում են և ճտիկով անջատվում։

Այս իրավիճակը գալիս է ապացուցելու, որ ժողովրդավարությունն ու մարդու իրավունքների պաշտպանությունը նրանց համար ընդհամենը բիզնես է, այլ ոչ թե համոզմունք և գաղափարախոսություն»,-ասել է Արեգնազ Մանուկյանը։

Մանրամասները՝ տեսանյութում։