ՆԱՏՕ-ն առաջին տարին չէ, որ փորձում է կառչել Հարավային Կովկասից և ամրապնդվել այնտեղ։ Այս մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ մեկնաբանելով Հյուսիսատլանտյան դաշինքի հետ համագործակցության խորացման անհրաժեշտության մասին ադրբեջանական ԶԼՄ-ների հրապարակումները։

Նրա խոսքով՝ հատկապես Ռուսաստանի հետ աշխարհաքաղաքական դիմակայության համատեքստում դաշինքն ակնհայտորեն նպատակ ունի օգտագործել տարածաշրջանի երկրների ներուժն ու ռեսուրսներն ի շահ հավաքական Արևմուտքի։

«Նրանց հետխորհրդային տարածքում պետք չեն հավասար հարաբերություններ, այլ ուզում են զավթել ռեսուրսները, թալանել երկրները, հրդեհել այդ ամենը և իրենց պահել որպես տիպիկ գաղութարարներ, իմպերիալիստներ։ Հուսով ենք, որ տարածաշրջանի երկրները, այդ թվում՝ Հայաստանն ու Ադրբեջանը, կգիտակցեն իրավիճակի խորացման, ՆԱՏՕ-ի հետ փոխգործակցության ընդլայնման վտանգները։ Բոլորին քաջ հայտնի է, թե ինչով է դա ավարտվում»,-ասել է Զախարովան։

Նրա խոսքով՝ ամենուր, որտեղ հայտնվում է Հյուսիսատլանտյան դաշինքը՝ սկսվում է առճակատում, աճում է լարվածությունը, մոռացվում են «խաղաղություն» և «կայունություն» բառերը։ Փոխարենը վրա է հասնում Արևմուտքի կողմից պարտադրված «նոր իրողությունը»։

Ավելի վաղ Զախարովան հայտարարել էր, որ Հարավային Կովկասի անվտանգության համար ՆԱՏՕ-ն ոչ մի լավ բան չի բերում, նրա հիմնական նպատակը լարվածության նոր օջախներ ստեղծելն ու տարածաշրջանը խարխլելն է։

***

Ուկրաինայի անվտանգության ծառայությունը մտադիր է Ռուսաստանի և Ադրբեջանի միջև առկա տարաձայնություններն օգտագործել ազգամիջյան ատելություն բորբոքելու համար: Այս հայտարարությունն արել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա խոսքով` ծրագրված սադրիչ արշավի շրջանակում նախատեսվում է գործարկել Ռուսաստանից փախած և վարձատրության դիմաց ՌԴ դրոշի ներքո գործելու պատրաստ մարդկանցից կազմված դիվերսիոն խմբեր, որոնք ակցիաներ կիրականացնեն նաև Ադրբեջանի քաղաքացիների, ներկայացուցչությունների և մշակութային օբյեկտների դեմ։

«Ուկրաինայի անվտանգության ծառայությունը նպատակ ունի նման սադրանքների միջոցով ադրբեջանական, թուրքական և եվրոպական մեդիատիրույթ մտցնել «ռուսական ագրեսիայի» մասին վիրուսային նարատիվ»,-ընդգծել է Զախարովան: