Հաշված օրերից օգոստոսի 1-ն է, ինչը նշանակում է՝ քաղաքացիները կրկին տուգանքի «մատերիալ» են դառնալու։

Հուլիսի 3-ի արտահերթ նիստում Ազգային ժողովը երկրորդ ընթերցմամբ և ամբողջությամբ ընդունեց ներհամայնքային տրանսպորտից օգտվելու կանոնները խախտելու համար տուգանքներ սահմանող օրենսդրական փաթեթը։

Օրենքը սահմանում է երեք հիմնական տուգանքի չափ՝

10,000 դրամ՝ ուղեվարձը չվճարելու կամ տոմսը չվավերացնելու համար։ Սա վերաբերում է այն դեպքերին, երբ ուղևորը փորձում է երթևեկել առանց վճարման։

15,000 դրամ՝ ուրիշի համար նախատեսված արտոնյալ տոմսից (օրինակ՝ թոշակառուի կամ ուսանողի) օգտվելու համար։ Սա ամենաբարձր տուգանքն է այս շարքում։

3,000 դրամ՝ տոմս ունենալու, սակայն այն վալիդատորով չվավերացնելու համար։ Այսինքն՝ այս տուգանքը նախատեսված է ոչ թե չվճարելու, այլ տրանսպորտային միջոց մտնելուց հետո ուղևորությունը չգրանցելու համար։

Իսկ այս ամենը վերահսկվելու է հսկիչների կողմից, որոնք լինելու են ավտոբուսներում։

Ստեղծված իրավիճակը շատ քաղաքացիների համար անընդունելի է. սկզբում ուղեվարձի թանկացում՝ հետո արդեն նման բարձր տուգանքներ։

«Մայր Հայաստան» դաշինքի անդամ Սոնա Աղեկյանը Mediahub-ի հետ զրույցում թեմայի վերաբերյալ իր մտահոգությունն է հայտնում, քանի որ ըստ նրա՝ հնարավոր չէ այս որոշումը իրագործել, և քաղաքային իշխանությունները հերթական անգամ ձախողելու են։

Աղեկյանի կարծիքով՝ սա թալանի յուրահատուկ տեսակ է։ «Ծանրաբեռնված ավտոբուսի մեջ ես չեմ պատկերացնում՝ ո՞նց է հսկիչը նույնականացնելու ուղևորին։ Մեկ րոպեի ընթացքում ուղևորը պիտի կարողանա հասցնել խցկվել տրանսպորտ և մոտենալ վալիդատորին կամ էլ իր անձնական հեռախոսը, քարտը փոխանցի անծանոթ մեկին, որ վճարի։ Նույն ժամանակ էլ հսկիչը պետք է հասցնի ներկայանալ, փաստաթուղթ տրամադրել։ Ես չգիտեմ՝ ոնց է դա կազմակերպվելու»։

Նա նշեց, որ տրոլյեբուսներում նույնպես լինելու են հսկիչներ, քանի որ այնտեղ ավելի շատ են բոյկոտին իրականացնողները՝ ուղեվարձը եռակի անգամ թանկացել է։