Ես կցանկանայի, որ կանոնիկ Հայ եկեղեցու վրա հարձակումներ չլինեն, և հակամարտությունը հնարավորինս շուտ լուծվի։ Այս մասին հայտարարել է ՌԴ ԱԳ նախարար Սերգեյ Լավրովը Ղրղզստանում ՀԱՊԿ արտաքին գործերի նախարարների խորհրդի արդյունքներով հրավիրված մամուլի ասուլիսում։

«Իրադարձություններն այդ երկրում նրա ներքին գործն են, բայց հարձակումները եկեղեցու դեմ մտահոգություն են առաջացնում։ Եկեղեցին միշտ եղել է հայ հասարակության առանցքային հենարաններից մեկը, և մենք բնավ չէինք ցանկանա, որ այդ եկեղեցին ենթարկվի չարդարացված հարձակումների՝ առանց որևէ լուրջ հիմնավորման»,-հայտնել է նա։

Լավրովը նաև նշել է, որ Հավաքական անվտանգության պայմանագրի կազմակերպության (ՀԱՊԿ) երկրները շարունակում են Հայաստանը համարել ասոցիացիայի լիիրավ անդամ, սակայն այս կարգավիճակը ենթադրում է կազմակերպության շրջանակում բոլոր պարտավորությունների կատարում, այդ թվում՝ անդամավճարների մուծում։

Միաժամանակ նա նշել է, որ ՀԱՊԿ արտաքին գործերի նախարարների խորհրդի մասնակիցները «նկատել են, որ ՀՀ արտաքին գործերի նախարարը կրկին հրաժարվել է մասնակցել այս միջոցառմանը»։

«Մենք ելնում ենք այն բանից, որ մեր պետությունների ղեկավարները, երբ հանդիպել են ՀԱՊԿ շրջանակում, նույնպես նկատի են ունեցել ՀԱՊԿ-ի նկատմամբ Հայաստանի վերաբերմունքի փաստը»,-ավելացրել է Լավրովը։

Նրա խոսքով՝ Հայաստանի ղեկավարության հայտարարությունները վկայում են, որ միտումները զարգանում են «բազմավեկտոր համատեքստում»։

«Մենք որեւէ ճնշում չենք գործադրում Հայաստանի իշխող շրջանակների վրա, մենք կսպասենք այս բոլոր հարցերի շուրջ պարզաբանումներին, բայց մենք բոլորս հասկանում ենք, որ եթե Հայաստանը հրաժարվի իր դաշնակիցներից, իր ամենամոտ գործընկերներից, իր հարևաններից, քիչ հավանական է, որ դա օգուտ բերի հայ ժողովրդին»,-նշել է ՌԴ ԱԳՆ ղեկավարը։