–Բացարձակապես անընդունելի բոլշևիկյան խայտառակ պրակտիկա է,– ասել է ԱԺ ՀՅԴ խմբակցության ղեկավար Վահան Հովհաննիսյանը՝ պատասխանելով լրագրողի հարցին՝ ինչպես է վերաբերվում այն փաստին, երբ հատկապես ՀՀԿ պետբյուջեի հաշվին ֆինանսավորվող այցերի ժամանակ զբաղվում են նաև դպրոցներում կուսակցական տոմսեր բաժանելով, ապա շարունակել,–անթույլատրելի է, երբ պետական բյուջեի միջոցներով կազմակերպված միջոցառումը հանկարծ ստանում է կուսակցական երանգ։

Նրա խոսքերով՝ սա նշանակում է, որ պետական իշխանությունը և կուսակցությունը սերտաճել են՝ այն, ինչ տեղի էր ունեցել Խորհրդային Միության ժամանակ։

–Սա կործանման սկիզբն է,–հայտարարել է նա։

Բանախոսի կարծիքով այդ պրակտիկան սկսվեց այն ժամանակ, երբ պետական պաշտոնյաներն սկսեցին «ֆռֆռալ» կուսակցական նշաններով։

–Ես չեմ տեսել մի երկիր, որտեղ նախագահը կամ վարչապետը կուսակցական նշաններ կրեն,–հավելել է նա։

Բանախոսը համոզված է, որ Հայաստանում ընտրություն տեղի չի ունենում, որովհետև այն պետք է ներքևից գա.

–Հայաստանում վերևից «քվեահունձ»՝ ձայների հավաք է տեղի ունենում։ Ոչ թե մարդկանց կամքն է կարևոր, այլ քաղաքական ուժի՝ այդ հունձը կատարելու համար ավելի կատարելագործված գործիքներ ունենալը։

7or.am