Ապրիլի 21-ից 25-ը Ռուսաստանի Դաշնության խոշորագույն տնտեսական, գիտական, կրթական կենտրոններից մեկում՝ Եկատերինբուրգում անցկացվեց երիտասարդության XV Եվրասիական տնտեսական ֆորումը։ Ֆորումի կազմակերպիչն Ուրալի պետական տնտեսագիտական համալսարանն էր։

Եվրասիական սիներգիա. «Բազմաբևեռություն–ինտեգրում–քաղաքակրթությունների երկխոսություն» թեմայով անցկացվող ֆորումին ժամանել էին ավելի քան 21 հազար մասնակից՝ աշխարհի 116 երկրներից։ Նրանց թվում էին դպրոցականներ, ուսանողներ, երիտասարդ գիտնականներ, դիվանագիտական ներկայացուցիչներ, Ռուսաստանի առաջատար բուհերի ռեկտորներ և պրոռեկտորներ, ինչպես նաև հյուրեր այլ երկրներից։

Հայաստանից ֆորումին հրավիրված էր և մասնակցում էր «Մայր Հայաստան» շարժումը, որի ներկայացուցիչ Դերենիկ Մալխասյանը հատուկ հյուրի կարգավիճակ ուներ։

Պաշտոնական Երևանը բաց էր թողել ֆորումի հարթակն օգտագործելու և մասնակիցներին իր պատկերացումներն ու ուղերձները փոխանցելու հնարավորությունը։ Սրան հակառակ, Ադրբեջանը պաշտոնապես մասնակցում էր Եկատերինբուրգում անցկացվող ֆորումին ու հարթակներից ֆորումին քննարկվող խնդիրների շուրջ ներկայացնում էր Ադրբեջանի տեսակետները։

Պաշտոնական Երևանի մերժողական դիրքորոշման հանգամանքը տարակուսանք էր առաջացրել ռուս գործընկերների շրջանում, քանզի ռուսական կողմից նկատվում էր Հայաստանի հետ բազմաշերտ հարաբերություններ զարգացնելու ու ամրապնդելու հստակ շահագրգռվածություն։ Այդ առումով «Մայր Հայաստանի» հետ համագործակցության տարբեր ձևաչափեր են քննարկվել ՌԴ–ն ներկայացնող գիտակրթական շրջանակների հետ։ Կարևորվել է ժողովրդական դիվանագիտության զարգացումը։

Ձևավորվող բազմաբևեռ նոր աշխարհակարգում Հայաստանը պետք է օգտագործի յուրաքանչյուր հնարավորություն՝ միջազգային միջոցառումներին մասնակցելու ու սեփական պատկերացումներն ու տեսակետները ներկայացնելու համար։

Հ․Գ․ Հատուկ շնորհակալություն մեր լավ բարեկամ Օլեգ Գորոբեցին՝ հայկական պատվիրակությանը ցուցաբերած ջերմ ընդունելության համար։