Տ. Գ. Շևչենկոյի անվան թիվ 42 ավագ դպրոցի մի խումբ ծնողներ դիմել են «7օր»–ի խմբագրություն՝ բողոքելով մաթեմատիկայի ուսուցչուհու գործողություններից։ Նրանց նամակում մասնավորապես ասված է.

«42 ավագ դպրոցի մաթեմատիկայի ուսուցչուհի Էմմա Իսպիրյանը 2 շաբաթ առաջ գնել է ԳԹԿ-ից մաթեմատիկայի նոր շտեմարաններից սովորական տպարանի գնով և սկսել է 11-րդ և 12-րդ դասարանի աշակերտներին համոզել, որ գնեն իր կողմից վաճառվող շտեմարանները՝ ասելով, թե նա էժան է վաճառում, իսկ գրախանութներում ավելի թանկ է:

1. Նա անօրինական կերպով դպրոցում սկսել է շտեմարանի վաճառք՝ ստիպելով աշակերտներին, որ գնեն իր կողմից վաճառվող շտեմարանները:
2. Բաժանել է իր կողմից ԳԹԿ-ից գնված շտեմարանները մյուս մաթեմատիկայի ուսուցիչներին և հրահանգել է վաճառել ավելի բարձր գնով, քան ինքն է վաճառում:
3. Տարբեր դասարաններում տարբեր գներ է առաջարկել և ստացվել է հետևյալ պատկերը:

Գնացանկ`

11-ի ընդհանուր հոսք 1 - 2600 դրամ

11-ի ընդհանուր հոսք 2 - 2700 դրամ

11-ի ընդհանուր հոսք 3 - 2800 դրամ

11-ի բնագիտամաթեմատիկական հոսք - 2300 դրամ

11-ի տնտեսագիտական հոսք - 2200 դրամ

12-ի ա - 2500 դրամ 12-ի բ - 2400 դրամ

Մյուս դասարաններում էլ են եղել առաջարկներ, բայց մերժվել են այդ դասարանների դասղեկների ու աշակերտների կողմից, քանի որ այդ դասարանները հումանիտար հոսքի են:

Գները՝ ըստ դասարանների, տարբերվում են: Որ դասարանում մաթեմատիկան ավելի խորացված կարգի են անցնում, այդ դասարանում ավելի մատչելի են գները, իսկ որտեղ որ միջին կարգի են անցնում, ավելի թանկ են: Էմմա Իսպիրյանն անօրինական կերպով և առանց տնօրենի իմացության, հենվելով փոխտնօրեններ Աիդա Շահվերդյանի և Լիանա Ավագյանի վրա, անում է իր ուզածը և ավել գումար շորթելով աշակերտներից՝ դնում է իր գրպանը: Երևի նոր տարվա գումար է հավաքում: Նա այդպես է անում, որ երեխաները, միանգամից ավել գումար վճարելով, գնեն իրենից, քանի որ ալարում են գնալ, հասնել գրախանութ և ավելի մատչելի գնով գնել այդ շտեմարանը: Նաև տեղեկացնենք Ձեզ, որ աշակերտները չեն սիրում Էմմա Իսպիրյանին և անընդհատ կոնֆլիկտի մեջ են մտնում նրա հետ: Աշակերտների ասելով՝ նա շատ կոպիտ ու անտաշ է և չի կարողանում դաս անցկացնել և լավ մաթեմատիկա էլ չգիտի: Էմմա Իսպիրյանը նաև ունի դասղեկական դասարան, որը նույնպես չի սիրում իրեն և ամեն ինչ անում է, որ ազատվի նրանից»։

Նշենք, որ սա այս դպրոցից ստացված միակ բողոքը չէ։

7or.am