«armsport.am»–ի փոխանցմամբ՝ «Հրազդան» մարզադաշտի փրկությանը նվիրված ակցիայի ժամանակ ՀՖՖ նախագահ Ռուբեն Հայրապետյանը լրագրողներին հայտնել է, որ նմանատիպ կառույցի կործանումը չի ներվի սերունդների կողմից: Ֆեդերացիայի ղեկավարը հայտնել է, որ «Հրազդանի» կողքին առևտրի կենտրոն կառուցելու դեպքում այնտեղ միջազգային խաղեր անցկացնել հնարավոր չի լինի.

–Այս պահին որևէ միջազգային խաղ չենք կարող անցկացնել: Շատ կարևոր է մարդկանց տարհանումը, որին կարող է խոչընդոտել առևտրի կենտրոնը: Բացի այդ, խոտածածկը պետք է փոխվի:

Հարցին՝ արդյոք Ռուբեն Հայրապետյանը չի՞ վախենում խնդիրներ ունենալ իր կուսակից Աշոտ Աղաբաբյանի դեմ դուրս գալով, ՀՖՖ նախագահը պատասխանել է.

–Երբ ես ծնվել եմ, իմ ծնողներն առաջինն իմ վախն են հանել: Ես չեմ վախենում: Աշոտ Աղաբաբյանն էլ է այս երկրի մարդ: Նրան պետք է ճիշտ մատուցել իրավիճակը: Սերունդները կդատապարտեն այս կառույցը կործանողներին: Միայն մարզադաշտ կառուցելու համար 500-600 մլն դոլար է պետք, իսկ նման գումարներ մեր պետությունը չունի: Այժմ կարելի է մարզադաշտը 10-15 մլն դոլարով վերանորոգել և անցկացնել միջազգային խաղեր: Ինձ քիչ է անհանգստացնում՝ ում սեփականությունն է այն: Այն պետք է ծառայի իր նպատակին: «Հրազդանի» սեփականատերը ժամանակին հայտարարել էր, որ մարզադաշտում կարելի է անցկացնել միջազգային խաղեր, որի վառ ապացույցը Հայաստան-Թուրքիա հանդիպումն է: Ռուբեն Հայրապետյանն այս կապակցությամբ ասել է.

–Այո՛, Հայաստան-Թուրքիա խաղն անցկացվեց այնտեղ, բայց տրիբունաներում 56 հազար մարդ չկար: Երբ 56 հազար մարդ լինի, ինչպե՞ս ենք ապահովելու նրանց անվտանգությունը:

Ռուբեն Հայրապետյանը համոզմունք է հայտնել, որ գալիք ընտրական փուլի մեկնարկում Մալթային և Բուլղարիային հյուրընկալվելիս 6 միավոր վաստակելուց հետո հայ ֆուտբոլասերներին հնարավոր չի լինի զսպել, քանի որ հաջորդ խաղը Երևանում է լինելու Իտալիայի հետ: Ռուբեն Հայրապետյանը հույս է հայտնել, որ առևտրի կենտրոն մարզադաշտի հարևանությամբ չի կառուցվի.

–Ես ամեն ինչ անելու եմ՝մինչև էքսկավատրի տակ պառկելը։

«7օր»–ը փորձել է կապ հաստատել Աշոտ Աղաբաբյանի հետ, սակայն նրա բջջային հեռախոսն անհասանելի է եղել։

7or.am