«Մայր Հայաստան» շարժման՝ Գյումրու քաղաքապետի թեկնածու Կարեն Սիմոնյանը հայտնել է Գյումրու ավագանու ընտրություններին մասնակցելու որոշման և քաղաքապետի պաշտոնին հավակնելու մասին․

Սիրելի՛ գյումրեցիներ,

Ես Կարեն Սիմոնյանն եմ: Ծնվել եմ Գյումրիում: Ավարտել եմ Հովհաննես Թումանյանի անվան դպրոցը: Բարձրագույն կրթությունս ստացել եմ Գյումրիի պետական մանկավարժական ինստիտուտում:

Ուսումից հետո ծառայել եմ Հայկական բանակի Հատուկ նշանակության զորքերում: Հաճույքով եմ հիշում ծառայության տարիները: Ստացել եմ բազմաթիվ պատվոգրեր: Չէր բացառվում, որ շարունակեի հետագա գործունեությունս որպես զինվորական, բայց կյանքս՝ հանգամանքների բերումով, այլ կերպ դասավորվեց:

Ունեմ շատ լավ ընտանիք: Կնոջս հետ մեծացնում ենք երեք երեխաների: Նրանց դաստիարակում ենք մեր հայկական ու նաև գյումրիական ավանդական արժեքներով:

Աշխատանքային գործունեությունս սկսել եմ բանվորություն անելով: Հիմա մի քանի հաջողակ ֆիրմաների հիմնադիր եմ և զարգացող բիզնեսների ղեկավար:

Հարգելի՛ գյումրեցիներ,

Խորհրդակցելով ընտանիքիս, թիմակիցներիս ու բազմաթիվ գյումրեցիների հետ՝ որոշել եմ մասնակցել Գյումրիի ավագանու արտահերթ ընտրություններին՝ հավակնելով քաղաքապետի պաշտոնին: Այդ որոշումս ամրապնդվեց Գյումրիում Ազատ տնտեսական գոտի ստեղծելու թեմայով ստորագրահավաքի ժամանակ: Մենք ստացանք 7.500 գյումրեցու աջակցություն և նրանց կողմից պատգամ, որ տեր կանգնենք այդ ծրագրին:

Հարց կարող է առաջանալ, թե ինչո՞ւ եմ ուզում քաղաքապետ ընտրվել: Որպես գործարար ես ինքնաբավ մարդ եմ, բայց անկեղծ լինեմ՝ չես կարող քեզ ինքնաբավ զգալ մի քաղաքում, որտեղ կա բարձր աղքատություն և որը դեռ վերջնականապես չի ձերբազատվել աղետի գոտու պիտակից: Ես իմ մեջ տեսնում եմ այն կարողությունը, որն օգուտ կբերի մեր քաղաքին: Ես տեսնում եմ, որ մենք ունենք հսկայական պոտենցիալ զարգացման գոտու վերածվելու համար: Իմ դրսի ու ներսի բիզնես ու քաղաքական կապերը ինձ վստահություն են տալիս, որ Ազատ տնտեսական գոտու ստեղծման և Գյումրիի համար հարկային առումով ազատ քաղաքի ռեժիմի սահմանման դեպքում մենք կկարողանանք հսկայական գումարներ ներգրավել և հազարավոր աշխատատեղեր ստեղծել մեր քաղաքում: Դրանից կշահի Գյումրին, Շիրակի մարզն ու ամբողջ Հայաստանը: Եթե մի բանի հավատում եմ ու կպնում եմ այդ գործին, միշտ հաջողում եմ: Վստահ եմ, որ միասնաբար կրկին կհասնենք հաջողության:

Ես հասկանում եմ, որ այդ հարցերն ավագանու մակարդակով չեն լուծվում, բայց ավագանին իր անելիքն ունի: Մենք՝ գյումրեցիներս, ևս մեր անելիքն ունենք: Մենք պետք է պահանջատեր լինենք: Հազարավոր գյումրեցիների ստորագրությունն Ազատ տնտեսական գոտու ստեղծման թեմայով ապագա ավագանու ուղերձի տակ այդ պահանջատիրության առաջին ու աննախադեպ դրսևորումն է: Ինչ իշխանություն էլ լինի, պետք է ընթացք տա մեր ծրագրին: Մենք պետք է պահանջենք ու ստիպենք, որպեսզի մեր կյանքը փոխվի:

Այս առումով շատ տրամաբանական է, որ ընտրություններին մասնակցում եմ «Մայր Հայաստան» շարժումով: Քանի որ շարժման առաջնորդ Անդրանիկ Թևանյանն է կանգնած Ազատ տնտեսական գոտու ծրագրի ստեղծման ակունքներում: «Մայր Հայաստանը» միակ ուժն է, որ երևանյան ռասիզմով չի տառապում և Գյումրիի համար հատուկ ծրագիր է մշակել, որը համապետական նշանակություն ունի:

Ես հուսով եմ, որ մեր թիմը և մեր ծրագիրը, որը ներառելու է նաև Գյումրիի ընթացիկ կառավարման մեր մոտեցումները, կստանա գյումրեցիների վստահության քվեն: Մենք հաղթանակի ակնկալիքով ենք մասնակցում:

Զուտ քաղաքական առումով ասեմ, որ մեր նվազագույն ծրագիրը Գյումրիում «Քաղաքացիական պայմանագրի» իշխանազրկումն է: Այս առումով մենք առաջիկայում կներկայացնենք ընտրություններին մասնակցելու մեր սկզբունքները:

Մենք կոչ ենք անում գյումրեցիներին միանալ մեզ, սատարել մեր ծրագրերին և քվեարկել մեր օգտին:

Միացե՛ք, որ փոխենք: