Ռուս քաղաքագետ, քաղաքական մշակույթի հիմնադրամի փորձագետ Անդրեյ Արեշևը Alpha News-ի հետ զրույցում մեկնաբանել է հայ-ռուսական հարաբերություններում ստեղծված իրավիճակը, Նիկոլ Փաշինյանի այցն ԱՄՆ և ամերիկյան նոր վարչակազմի հետ հարաբերությունները կարգավորելու նրա փորձերը, ինչպես նաև կհաջողվի՞ արդյոք ԱՄՆ նախագահ Դոնալդ Թրամփին դադարեցնել ուկրաինական հակամարտությունը:

Փորձագետի կարծիքով՝ Թրամփի կողմից ուկրաինական հակամարտության կարգավորման գործընթացը հեշտ չի լինելու։

«Կարծում եմ, որ կլինի ձգձգվող բանակցությունների երկար փուլ, որի ընթացքում, հնարավոր է, որոշ ուղիներ գտնվեն նախկին ուկրաինական ԽՍՀ-ի տարածքում զինված հակամարտության գոտում ժամանակավոր հրադադարի հասնելու համար։ Ինձ համար միանգամայն ակնհայտ է, որ գործընթացը հեշտ, առանց խնդիրների չի լինելու, քանի որ կողմերի ելակետային դիրքորոշումները խիստ տարբերվում են միմյանցից։ Եվ այս փուլում այդ հակամարտության միջանկյալ ավարտին հասնելու համար երկար աշխատանք է սպասվում»,-ասել է Արեշեւը։

Անդրադառնալով Հայաստանի և Ադրբեջանի հարաբերություններին՝ քաղաքագետը նշել է, որ Ադրբեջանի նախագահ Իլհամ Ալիևը Հայաստանի նկատմամբ տարածքային պահանջների հարցում ընդունակ է ծայրահեղ բնույթի գործողությունների:

«Կարծում եմ, որ Իլհամ Ալիևի հայտարարություններին՝ կապված էսկալացիայի և Հայաստանի նկատմամբ հետագա տարածքային պահանջների հետ, պետք է բավականին լուրջ վերաբերվել, քանի որ վերջին տարիներին նա բազմիցս ցույց է տվել, որ ունակ է տարբեր տեսակի գործողությունների, այդ թվում՝ ծայրահեղական բնույթի, և դրա համար օգտագործում է առկա բոլոր հնարավորությունները»,-նշել է Արեշեւը։

Ինչ վերաբերում է Փաշինյանի այցին ԱՄՆ և ինչ պետք է ակնկալել Թրամփից Հարավային Կովկասի տարածաշրջանի վերաբերյալ, փորձագետը կարծում է, որ Փաշինյանը տենդագին հանդիպումներ է փնտրում ԱՄՆ ազդեցիկ դեմքերից որևէ մեկի հետ, իսկ Թրամփի հետաքրքրությունը տարածաշրջանի նկատմամբ կլինի պրոֆիլային գերատեսչությունների մակարդակով:

«Ինձ մոտ տպավորություն է, որ պարոն Փաշինյանն ու իր թիմը, որոնք այցով մեկնել են ԱՄՆ, տենդագին հանդիպումներ են փնտրում, եթե ոչ հենց Թրամփի, ապա գոնե ազդեցիկ անձանցից որևէ մեկի հետ։ Ինչ վերաբերում Է Թրամփի արտաքին քաղաքական առաջնահերթություններին, ապա նրա որոշ հայտարարություններից տեսնում ենք, որ, իհարկե, նրա համար կարևոր է Մերձավոր Արևելքն իրանական հարցի համատեքստում։ Թրամփի կողմից հնչել են բավական խառնաշփոթ արտահայտություններ, բայց, այնուամենայնիվ, թույլ են տալիս հուսալ, որ տարածաշրջանում մեծ պատերազմից, այնուամենայնիվ, մենք կխուսափենք։

Ինչ վերաբերում է Կովկասին, ինձ թվում է, որ այդ տարածաշրջանի նկատմամբ հետաքրքրությունը կպահպանվի նախ պրոֆիլային գերատեսչությունների և այն կառույցների մակարդակով, որոնք ներգրավվելու են Պետդեպարտամենտի միջոցով՝ հաշվի առնելով ԱՄՆ Միջազգային օգնության գործակալության վերաձևակերպումը։ Ստույգ դատել այն մասին, թե ինչին է ուղղվելու ԱՄՆ-ի հիմնական ուշադրությունը, մենք կկարողանանք տեսնել մի քանի ամիս անց, երբ կադրային հարցը մի փոքր կարգավորվի և անցումային շրջանն ավարտվի»,-եզրափակել է Արեշևը։