Այսօր ՀՅԴ խմբակցությունը խորհրդարանում արտահերթ կարգով բարձրացրել է հարցապնդում, որով ՀՀ նախագահին ԱԺ–ի կողմից առաջարկվում է քննարկել ՀՀ կառավարությանն անվստահություն հայտնելու հարցը։ Անդրադառնալով այդ հարցապնդմանը՝ ՀՀ վարչապետ Տիգրան Սարգսյանն ասել է, որ դա ընդդիմադիր քաղաքական ուժի իրավունքն է և այդ հարցադրումն ունի քաղաքական բովանդակություն։

–Մենք ԱԺ–ում ունենք բացարձակ մեծամասնություն, կառավարելիության մակարդակը բավականին բարձր է և մենք մշտապես ուսումնասիրում ենք նաև մեր բնակչության կարծիքը կառավարության կողմից իրականացվող միջոցառումների վերաբերյալ, հստակ պատկերացնում ենք, թե ովքեր են դժգոհ, ովքեր դժգոհ չեն, ովքեր են մեզ աջակցում, և կարծում եմ, որ որևիցե քաղաքական ճգնաժամ Հայաստանում չկա, որպեսզի կառավարությունը հրաժարական տա։ Աշխարհում այսօր չկա որևէ պետություն, որտեղ կան կատարված ցուցանիշներ։ Դրա համար դա կոչվում է ճգնաժամ։

«7օր»–ի դիտարկմանը, որ նախկինում հենց Տիգրան Սարգսյանն էր պնդում, թե Հայաստանը շրջանցելու է ճգնաժամը՝ նա պատասխանել է.

–Այո՛, ցանկացած կառավարություն փորձում է շրջանցել ճգնաժամը և մենք նույնպես փորձելու ենք շրջանցել։ Որքանով դա մեզ կհաջողվի, դրա մասին կդատեն մեր քաղաքացիները։

«7օր»–ը վարչապետից հետաքրքրվել է նաև՝ այս կիրակի հրավիրված ՀՀԿ–ի տնտեսական սեմինարի ժամանակ նա մինչև 2020թ. համար թվերով ներկայացրել է կատարվելիք ծրագրերը, սակայն ինչպե՞ս պետք է հանրությունը հավատա այդ թվերին, եթե մինչ այժմ հայտարարված թվերն արդեն իսկ չեն կատարվել։

–Կան բազմաթիվ թվեր, որոնք կատարվել են և գերակատարվել են, որոնք վրիպում են ձեր ուշադրությունից, իսկ այն թվերը, որոնք չեն կատարվում, մշտապես գտնվում են ձեր ուշադրության կենտրոնում, ինչը ես համարում եմ նորմալ երևույթ,–պատասխանել է Տ. Սարգսյանը՝ նշելով, որ այդ քննարկումներն օգնում են իրենց։

7or.am