«ՀՀԿ-ն գոնե պետք է խիզախություն ունենար և ներողություն խնդրեր իր պատգամավորի փոխարեն, իսկ Սամվել Նիկոյանը՝ իր անկարողության համար»,–այսօր կայացած ասուլիսում անդրադառնալով երեկ ԱԺ–ում ՀՀԿ-ական պատգամավոր Առաքել Մովսիսյանի (Շմայս) և «Ժառանգություն» կուսակցության պատգամավոր Արմեն Մարտիրոսյանի միջև տեղի ունեցած միջադեպին՝ հայտարարել է ԱԺ «Ժառանգություն» խմբակցության ղեկավար Ստեփան Սաֆարյանը:

Նրա խոսքերով՝ սա առաջին դեպքը չէ, երբ խնդիրներ են ծագում հանրապետական պատգամավորների և կոնկրետ Առաքել Մովսիսյանի հետ։

«Սրանից առաջ Շմայսը Զարուհի Փոստանջյանի հանդեպ էր անվայելուչ պահվածք և արտահայտություններ թույլ տվել: Նկատի ունենալով այդ դեպքը՝ այս անգամ էլ իրավական հարթության վրա խնդիրը չի լուծվի, ես լուրջ հույսեր այդ ուղղությամբ չեմ փայփայում»,–հավելել է Ս. Սաֆարյանը։

–Խորհրդարանը խուլիգանանոց չէ. այստեղ բոլորը պիտի հասկանան, թե ով ինչ է անում,–ընդգծել է նա: