Նոյեմբերի 19–ին Բեռլինի Ֆիլհարմոնիայի կամերային դահլիճում RIAS կամերային երգչախմբի, Մյունխենի կամերային նվագախմբի, մենակատարներ Քրիստինա Քայզերի (սոպրանո), էնդրյու Ռեդմոնդի (բարիտոն), դիրիժոր Ալեքսանդր Լիբրայխի կատարմամբ կայացել է հայազգի մեծանուն կոմպոզիտոր Տիգրան Մանսուրյանի՝ Հայոց ցեղասպանության զոհերի հիշատակին նվիրված «Ռեքվիեմի» համաշխարհային պրեմիերան:

Այն ներկայացվել է գերմանական ևս երեք քաղաքներում: Լրագրողների  հետ  հանդիպման ժամանակ  կոմպոզիտոր Տիգրան Մանսուրյանն ասել է, որ «Ռեքվիեմ»–ը (Հավերժական հանգիստ) պատվիրել են Բեռլինի RIAS կամերային երգչախումբն ու Մյունխենի կամերային նվագախումբը, և ինքը գոհ է գերմանացիների կատարումից:

–Շուրջ 10 տարի աշխատել եմ Հայոց ցեղասպանության զոհերի հիշատակին գրված «Ռեքվիեմի» վրա: Չափազանց շատ է այս տեքստով երգվել, ու ես գտա իմ բանալին՝ իրար եմ միացրել լատինական լեզուն ու բնիկ հայկական երգեցողությունը: Երգեցողությունն իրենով էր արել «Ռեքվիեմի» լատինական տեքստը: Ներկայացրել եմ հայ ժողովրդի համընդհանուր ցավը, ինչպես նաև իմ ընտանիքի պատմությունը,–ասել է նա: Ըստ  կոմպոզիտորի՝ գերմանացիները բուռն ընդունելության են արժանացրել ու հոտնկայս ծափահարել, իսկ համերգին ներկա է եղել նաև Գերմանիայում ՀՀ դեսպանն իր տիկնոջ հետ: Ըստ պայմանագրի՝ «Ռեքվիեմ»–ը տարիուկես պետք է երգեն ու նվագեն միայն պատվիրատուները: