Գյումրու անհատական տաքսու վարորդները կրկին խոստանում են բողոքի ալիք բարձրացնել դեռևս  2009–ին կառավարության ընդունած որոշման դեմ, որով նախատեսվում էր, որ բոլոր անհատական տաքսիները պետք է գործեն հարկային դաշտում, դեղին պետհամարանիշներ, հաշվիչներ ձեռք բերեն, մեքենաներն ունենան առավելագույնը 10 տարվա հնություն, և մի շարք այլ միջոցառումներ ձեռնարկեն, որոնք ֆինանսական միջոցներ են պահանջում: Սակայն գյումրեցի տաքսիստների աննախադեպ բողոքի ակցիաներից հետո կառավարությունը հրաժարվեց մարզերում կիրառել որոշումը, և խնդիրն առկախված մնաց:

Օրերս ՀՀ տրանսպորտի և կապի նախարար Մանուկ Վարդանյանը հայտարարել է, որ կառավարությունը հանում է մեքենայի 10 տարվա հնության սահմանափակումը, սակայն մարզերում բոլոր անհատ տաքսիները պետք է մտնեն հարկային դաշտ և գործեն 2009թ. ընդունած անհատական տաքսիների լիցենզավորման օրենքի շրջանակներում: Գյումրու անհատական տաքսու վարորդները կրկին պնդում են, որ օրեցօր խորացող սոցիալ–տնտեսական ճգնաժամի և բնակչության անվճարունակության պայմաններում ի վիճակի չեն լինելու աշխատել հարկային դաշտում և միաժամանակ ընտանիք պահել:

«Ինչի՞ համար հարկային դաշտ մտնեմ. աշխատածս 1000 դրամը իրենց տամ, թոռների՞ս ով պահի: Ժողովրդի ձեռքը գումար չկա, առանց այդ էլ հազվադեպ են տաքսիներից օգտվում, հիմա ծառայության գինը թանկացնենք, ընդհանրապես օգտվող չի լինի: Բացի այդ, ես մի մեքենայի համար պետք է այնքան հարկ վճարեմ, ինչքան վճարում է 10-15 ավտոմեքենա ունեցող տաքսի ծառայությունը»,- ասում է անհատ տաքսու վարորդ Վաղինակ Գալստյանը:

Այժմ լիցենզիայի, դեղին պետհամարանիշների և հաշվիչի համար անհատ տաքսիստներին հարկավոր կլինի մոտավորապես 200 հազ դրամ, ինչը գյումրեցի տաքսիստի համար աննախադեպ գումար է: Նրանցից շատերը նշում են, որ օրենքի կիրառության դեպքում ստիպված պետք է հրաժարվեն տաքսի վարելուց, իսկ եկամտի այլ աղբյուր Գյումրիում գտնելը բավականին դժվար է: Հետևաբար, անհատ տաքսիստները պատրաստվում են պայքարի երկրորդ փուլին, եթե կառավարությունը որոշի բռնի ուժով օրենքը կիրառության դնել՝ առանց պայմանների վերանայման:

«Իչպես անցած անգամ միահամուռ ուժերով պայքարեցիք մինչև վերջ, հիմա էլ պատրաստվում ենք նույնը անել»,- նշել է անհատ տաքսիստ Վարդան Հարությունյանը:

Ստացվում է, որ 2012թ. բյուջեով նախատեսված հարկային բեռի ծանրացումը զգալու են ոչ թե օլիգարխները, այլ մարզերում աշխատող անհատական տաքսու վարորդները:

Դերենիկ Մալխասյան

Գյումրի