Հրապարակելու խնդրանքով «Երկիր» միությանն առձեռն փոխանցվել է հանրագիր (կից ստորագրություններով) ի պաշտպանություն ջավախքահայ քաղաքական գործիչ Վահագն Չախալյանի՝ հասցեագրված ՀՀ նախագահ Սերժ Սարգսյանին: Հանրագիրը կազմվել է Ջավախքում, այն ստորագրել է երկրամասի 1600–ից ավել բնակիչ:

Ստորև ներկայացնում ենք հանրագրի տեքստը:

Հայաստանի Հանրապետության նախագահ պարոն Սերժ Սարգսյանին

Ջավախքի ժողովրդից կոչ

Ջավախքահայ ազգային, հասարակական, քաղաքական գործիչ Վահագն Չախալյանը իր գործունեության ընթացքում պայքարում է ոչ միայն Ջավախքի բնակչության սոցիալ-տնտեսական վիճակի բարելավման, ջավախքահայության ազգային, մշակութային, լեզվական, կրոնական և կրթական արժեքների պահպանման համար, այլ նաև Ջավախքի հայաթափման ու թուրքերով վերաբնակեցման դեմն առնելու, ՀՀ-ն կատարյալ շրջափակումից  զերծ պահելու, ի հաշիվ թուրքերի Վրաստանի էթնիկ կազմի փոփոխումը արգելելու ուղղություններով:

Վերոնշյալ գործողության պատճառով Վահագն Չախալյանը Վրաստանի իշխանությունների կողմից ենթարկվեց քաղաքական հետապնդումների` ապօրինի ձերբակալության, դատավարության և բանտարկության։

Բանտարկված Վահագնը մարմնավորում է հայաթափվող Ջավախքի, շրջափակված Հայաստանի, Արցախի և աշխարհով մեկ սփռված հայության գոյապայքարի ճակատագիրը։

Ուստի մենք` ներքոստորագրյալներս, կոչ ենք անոմ Ձեզ` Վրաստան կատարվելից ձեր առաջիկա այցի ընթացքում վրաց իշխանությունների ներկայացուցիչների հետ հանդիպումների ժամանակ բարձրացնել շինծու մեղադրանքներով ազատազրկված Վահագն Չախալյանի արդարացման և ազատ արձակման խնդիրը։