Ազգային ժողովի արտահերթ նիստը սկսվելուց առաջ խորհրդարանի շենքի մոտ բողոքի գործողություն են սկսել մի շարք բնապահպաններ՝ ընդդեմ «Ընդերքի մասին» և «Շրջակա միջավայրի վրա ազդեցության փորձաքննության մասին օրենքում փոփոխություններ և լրացումներ կատարելու մասին» օրինագծերի։ Նրանք ձեռք ձեռքի բռնած պատ կազմելով, դեմքով դեպի ԱԺ–ի շենքը կանգնել են և պահանջել դադարեցնել բնության անխնա օգտագործումը։

«Էկոդար» կազմակերպության իրավաբան Արթուր Գրիգորյանը «7օր»–ին ասել է, որ այս օրինագծով, ըստ էության, հասարակությունը մեկուսացվում է բնապահպանական բոլոր գործընթացներից։

–Սահմանվում են հանրային լսումներ կազմակերպելու սեղմ ժամկետներ։ Բայց գործնականում այդ սահմանափակ ժամկետներում հնարավոր չէ հասնցել մասնակցել լսումներին,–ընդգծել է,–իսկ օրինակ, այս նախագծով Բ կատեգորիայում ներառված են անտառահատումներ՝ 5հա և ավելին, քաղաքաշինական կառուցապատումներ և այլն, ընդհանրապես հանրային լսում չի անցկացվելու։ Դա միայն նախաձեռնողի կամ համայնքի ղեկավարի կամքով է արվելու։ Ինչպես նաև, մասնագիտական փորձաքննություն չի անցկացվելու։ Իսկ 5 հեկտարից ցածր, ընդհանրապես ենթակա չէ փորձաքննության։ սա խայտառակություն է, աբսուրդ։ Իրենք արտահերթով բերեցին այս օրինագիծը, որովհետև չէին սպասում, որ մենք կարող ենք խորհրդարանի սայտը քչփորենք, գտնենք և աղմուկ բարձրացնենք։

Ա. Գրիգորյանը նաև ավելացրել է, որ օրինագծի ընդունումից հետո էլ բոլոր հնարավոր միջոցներով պայքարելու են, որպեսզի այն կյանքի չկոչվի։

–Հարկ եղած դեպքում կարելի է հարցը քաղաքականացնել։ Իմ խորին համոզմամբ, ցանկացած հարց, որն արդարացի լուծում չի ստանում մասնագիտական, իրավական հարթության վրա, քաղաքականացվում է։ Բնապահպանական հանրության նպատակը պետք է լինի նաև այդ քաղաքականացված գործընթացից օգուտներ քաղել։ Այն ուժերը, որոնք շրջանառելու են այս խնդիրը՝ իրենց նպատակներից ելնելով, մենք էլ պետք է փորձենք այնպես անել, որ ոչ միայն խոսեն այդ մասին, այլ ինչ–որ բան անեն,–նշել է նա։

Իսկ արդեն ԱԺ–ի նիստի ժամանակ «Ժառանգություն» խմբակցության ղեկավար Ստյոպա Սաֆարյանը հայտարարել է, որ սա ընդերքը բարբարոսաբար շահագործելու օրինագիծ է ու առաջարկել է դեմ քվեարկել դրան։

Ի վերջո, 73 կողմ, 7 դեմ, 0 ձեռնպահ ձայների հարաբերակցությամբ «Ընդերքի մասին»օրինագիծը երկրորդ ընթերցմամբ ընդունվել է։

7or.am