Քրդստանի տարածաշրջանային կառավարության (KRG) Մարդու իրավունքների միջազգային համակարգող Դինդար Զեբարին Իռլանդիայի Դուբլին քաղաքում տեղի ունեցող հատուկ կոնֆերանսում, ընդգծել է եզդիների դեմ հանցագործությունները հետաքննելու միասնական մեխանիզմի ստեղծման հրատապ անհրաժեշտությունը:

Սեպտեմբերի 10-ին կայացած հանդիպմանը մասնակցել են Իռլանդիայի արտաքին գործերի նախարարության, Իրաքի դաշնային կառավարության, Յազդայի, Միգրացիայի միջազգային կազմակերպության (ՄՄԿ) ներկայացուցիչներ, ինչպես նաև` գիտնականներ և իրավապաշտպաններ:

Իր ելույթում Զեբարին հիշեցրել է «Իսլամական պետության» (ԻՊ) ահաբեկիչների վայրագությունները եզդիների դեմ՝ ընդգծելով, որ դրանք ցեղասպանություն են՝ միջազգային հանցագործություն բոլոր չափանիշներով։

Նա խոսել է արդարության հասնելու KRG-ի ջանքերի մասին, ներառյալ` նախարարական կոմիտեի ձևավորումը՝ ԻՊ-ի հանցագործությունները որպես ցեղասպանություն ճանաչելու համար: Զեբարին նաև նշել է ԻՊ-ի դեմ ՄԱԿ-ի հետաքննող խմբի հետ (UNITAD) շարունակական համագործակցությունը, որը կարևոր դեր է խաղացել ցեղասպանության ապացույցներ հավաքելու համար:

Զեբարին վիճակագրություն է ներկայացրել ԻՊ-ի հանցագործների դատավարությունների վերաբերյալ՝ նշելով, որ, ըստ Քրդստանի տարածաշրջանային դատական ​​խորհրդի, 2021 թվականից մինչև 2024 թվականի մարտը Իրաքում քրեական հետապնդման են ենթարկվել ԻՊ-ի 498 անդամներ, ևս 123-ը դատվել են Քրդստանի տարածքում։ Նա ընդգծել է, որ KRG-ն շարունակում է փրկել և վերականգնել եզդի փրկվածներին, և մինչ այժմ ահաբեկիչների գերությունից ազատվել է 3579 մարդ, թեև 2579-ը մնում են անհայտ կորած:

Բացի այդ, KRG-ի ներկայացուցիչը կոչ է արել անհապաղ ստեղծել մեկ միջազգային մեխանիզմ՝ «Իսլամական պետության» հանցագործությունները հետաքննելու և արդարություն ապահովելու բոլոր զոհերի համար՝ անկախ նրանց կրոնական, էթնիկական կամ աղանդավորական պատկանելությունից: Նա նաև ընդգծել է ցեղասպանության զոհերին և նրանց ընտանիքներին փոխհատուցում վճարելու կարևորությունը։

Աղբյուրը՝ Zham.am