Ցանկացած մարդու ակնկալիքն ու պայքարն արդարության համար է, կլինի իմ գործով, թե՝ ուրիշի գործով: Այս մասին, այսօր՝ սեկտեմբերի 6-ին, հերթական դատական նիստի ավարտից հետո լրագրողների հետ զրույցում ասաց ՍԴ դատավոր Հրայր Թովմասյանը՝ անդրադառալով հարցին, թե ինչ ակնկալիքներ ունի իր գործի վճռի մասով:

«Իմ կյանքի վերջին 10-15 տարին եղել է հրապարակային և դա եղել է աշխատանք արդարության հաստատման համար, բնականաբար, իմ գործով էլ ես չեմ կարող ակնկալել կամ այլ բան մտածել: Անկախ դատավորի ցուցաբերած վարքագծից ու ընդունած որոշումներից, մինչև վերջին պահն էլ ակնկալում եմ արդար վճիռ: Ես հիմա հակառակ պնդում չեմ անելու»,-հայտարարեց Թովմասյանը:

Նա ընդգծեց՝ անկախ նրանից, թե այս ամեն ինչը ինչ հիմքով է սկսվել, ինքն ու իր պաշտպանական թիմը շարունակում են դասական առումով իրականացնել իր պաշտպանությունը. «Ինչ կընդունի, ինչ կլինի, դրանից աշխարհը շուռ չի գա, աշխարհը սրանով չի ավարտվի: Միշտ էլ ամեն ինչ ունի երկրորդ խաղակեսը, և երկրորդ խաղակեսում շատ բաներ կարող են փոխվել:

Այս արագ փոփոխվող աշխարհում էլ թող ոչ ոք չմտածի՝ կարող է ինչ-որ բան անել ու այդպես մինչև կյանքի վերջ ոչ ոք չիմանա ու ոչինչ չլինի»,-շեշտեց Թովմասյանը:

Անդրադառնալով նրան, որ դատախազը 7 տարվա ազատազրկում է պահանջում իր համար, նա ասաց. «Նման պնդումը պոստմոդեռնիստական աբսուրդի ժանրից է եւ նման պնդում անողին կարելի է Նոբելյան մրցանակ տալ»:

Հիշեցնենք, որ Հրայր Թովմասյանին մեղադրանք է առաջադրվել պաշտոնեական լիազորությունները չարաշահելու համար, որն առաջացրել է ծանր հետևանքներ։ Մեղադրող կողմը պահանջում է 7 տարի ազատազրկում: Թովմասյանը չի ընդունում մեղադրանքը և որակում է այն քաղաքական:

Աղբյուրը՝ news.am