Պատմական գիտությունների թեկնածու, Մոսկվայի Միջազգային հարաբերությունների պետական ինստիտուտի Կովկասի և տարածաշրջանային անվտանգության կենտրոնի ավագ գիտաշխատող Նիկոլայ Սիլաևը Alpha News-ին մեկնաբանել է Ռուսաստանի և Հայաստանի հարաբերությունները, տարածաշրջանում Արևմուտքի դիրքորոշումը և Երևանի և Բաքվի միջև բանակցային գործընթացը։

«Այն թիմը, որ այժմ գլխավորում է Հայաստանը, «անվերադարձելիության կետն» արդեն անցել է։ Նույնիսկ եթե պատկերացնենք, որ Հայաստանի իշխանությունները 180 աստիճանով կշրջվեն, ապա հազիվ թե Մոսկվայում նման շրջադարձը ինչ-որ վստահությամբ ընկալվի։ Այլ բան է, որ Հայաստանի իշխանությունները հասկանում են, թե ինչի հետ են խաղում և փորձում են ավելի քիչ անշրջելի քայլեր անել, կամ գոնե մեծ անդառնալի քայլեր չանել, ինչպիսիք են ՀԱՊԿ-ից դուրս գալը, ԵԱՏՄ-ից դուրս գալը, ռուսական ռազմաբազայի դուրսբերումը, թեև սահմանապահներին արդեն դուրս են բերել։ Հայաստանի իշխանությունները ելնում են նրանից, որ նման փոքր քայլերով նրանք կհեռանան Ռուսաստանից»,-ասել է Սիլաևը։

Փորձագետի կարծիքով, Հայաստանի իշխանություններն իրենք են կազմակերպել Ռուսաստանի և Հայաստանի հարաբերությունների ճգնաժամը։

«Ռուսաստանի և Հայաստանի հարաբերությունների այս ճգնաժամը Ռուսաստանի կողմից չի կազմակերպվել, դա եղել է Հայաստանի իշխանությունների կողմից։ Ուստի նրանք են պատասխանատու կատարվածի համար, և նրանք պետք է կայացնեն այն որոշումները, որոնք բխում են իրենց քաղաքական գծից։ Միանգամայն նորմալ է, որ Մոսկվան չի ցանկանում պատասխանատվություն ստանձնել Հայաստանի հետ հարաբերությունների խզման համար, քանի որ Մոսկվան չէ այդ խզման հեղինակը»,-ընդգծել է Սիլաևը։