Վրաստանի արևմտյան մասում հնագետները հայտնաբերել են մարդու կմախք, որն ապրել է մոտ 10 հազար տարի առաջ, գրում է NewsGeorgia-ն։

Եզակի գտածոն հայտնաբերվել է Սաչխերեի մունիցիպալիտետի Բոնդի քարանձավում։

Աճյուններով թմբի վրա քարեր են դարսված եղել։ Սա, ըստ գիտնականների, բնորոշ է հնագույն թաղման ծեսերին։

Նախնական գնահատմամբ, կմախքը պատկանում է մինչև 12 տարեկան երեխայի։

Բոնդի քարանձավը հետազոտվել է Վրաստանի պետական ​​համալսարանի պրոֆեսոր Իլյա Նիկոլոզ Տուշաբրամիշվիլիի գլխավորած արշավախմբի ժամանակ։

Գտածոները տեղափոխվել են Չիաթուրայի երկրագիտական ​​թանգարան։ Մոտ ապագայում գիտնականները պետք է վերծանեն հին մարդու ոսկորից հանված ԴՆԹ-ն։

Գենետիկական անալիզները կիրականացվեն արտասահմանյան լաբորատորիաներում՝ Մեծ Բրիտանիայի, ԱՄՆ-ի և Ճապոնիայի փորձագետների ներգրավմամբ։

Պրոֆեսորը ենթադրում է, որ դեռահասը կարող է լինել Կոթեի «զարմիկը»՝ այսպես են անվանել այն ​​տղամարդու, որի կմախքը հնագետները հայտնաբերել էին անցյալ տարի մոտակա Կոթիա քարանձավում։

Աճյունների հաստատված տարիքը 9700 տարի է։

«Սա արևմտաեվրոպական գենոմ է, որը չորս գենետիկ գիծ ունի։ Չորսից մեկը Հարավային Կովկասից է»,-ասել է Տուշաբրամիշվիլին «Ռուսթավի 2»-ին տված հարցազրույցում։

Բոնդի քարանձավը եզակի հնագիտական ​​վայր է։ Պրոֆեսոր Տուշաբրամիշվիլին հայտնաբերել է այն 2007 թվականին։

Աղբյուրը՝ news.am