Հայաստանում ֆրանսիական համալսարանի (ՀՖՀՀ)  տարածած հաղորդագրության մեջ ասվում է, որ ՀՀ Վճռաբեկ դատարանի կողմից համալսարանի 12 դասախոսների աշխատանքից ազատման որոշումը չեղյալ հայտարարելու մասին վճիռը հրապարակելուն պես, ՀՖՀՀ-ն անմիջապես ձեռնամուխ է եղել դրա իրականացմանը։

«Համալսարանը, առանց հապաղելու, տվյալ դասախոսներին տրամադրել է ամբողջական փոխհատուցում, նրանց ներգրավել աշխատանքում և վերականգնել նրանց իրավունքները, նրանց հանձնարարել է միևնույն առարկաների դասավանդումը և դասաժամերը, ինչ նախկինում՝ հիմք ընդունելով 2011-2012 ուսումնական տարվա համար նախատեսված ծրագրերը։

Ինչպես ընդգծեց Ֆրանսիայի Հանրապետության նախագահը ս.թ. հոկտեմբերի 6-7-ը Երևան կատարած պետական այցի ընթացքում, ՀՖՀՀ-ն կշարունակի իրագործել իր առաքելությունը, խստորեն պահպանելով բարձրագույն կրթության ֆրանսիական ավանդույթները, ինչը նրա ուժի, հաջողության և հեղինակության գրավականն է»,- ասված է ՀՖՀՀ հաղորդագրությունում։