ՀԴԲ-ի և Ազգային պարկերի ծառայության տվյալներով, ԱՄՆ 26-րդ նախագահ Թեոդոր Ռուզվելտին պատկանող գրպանի ժամացույցը, տասնամյակներ առաջ գողացվելուց և ավելի ուշ աճուրդի հանվելուց հետո այս շաբաթ վերադարձվել է Նյու Յորքի նրա տուն:

Ռուզվելտի քույրը՝ Կորին Ռուզվելտ Ռոբինսոնը, և նրա աներորդին՝ Դուգլաս Ռոբինսոն կրտսերը, Ռուզվետին են նվիրել այս ժամացույցը 1898 թվականին Կուբայում իսպանա-ամերիկյան պատերազմի մեկնելուց առաջ։

Ժամացույցի ներսի կողմում փորագրված է հետևյալ մակագրությունը՝ «ԹԵՈԴՈՐ ՌՈՒԶՎԵԼՏԻՆ Դ.Ռ.-ից և Կ.Ռ.Ռ.-ից»։

Ըստ պարկերի ծառայության, արծաթե ժամացույցը նրա հետ է եղել պատերազմի, Աֆրիկայում որսի և Հարավային Ամերիկայում Ամազոնն ուսումնասիրելու ժամանակ։ 1919 թվականին 26-րդ նախագահի մահից հետո նրա ժամացույցը պահպանվում էր որպես հուշանվեր և ի վերջո հանձնվել է պարկերի ծառայությանը՝ Լոնգ Այլենդի Սագամոր-Հիլ ազգային պատմական կենտրոնում ցուցադրելու նպատակով:

1971թ.-ին ժամացույցը վարձով տրվել է Նյու Յորքի Բուֆալոյում գտնվող Թեոդոր Ռուզվելտի անվան ազգային պատմական կենտրոնին սկզբում վեց տարի, ապա ավելի երկար ժամկետով։

Սակայն 1987 թվականի հուլիսի 21-ին ժամացույցը գողացվել է այն վայրից, որտեղ այն վերջին անգամ ցուցադրվել է, այն է՝ Բուֆալոյի Էնսլի Ուիլքոքսի տնից:

Միայն անցյալ տարի՝ 36 տարի անց, ժամացույցը կրկին հայտնվել է Ֆլորիդայի աճուրդում: Աճուրդավարը հասկացել է, թե դա ում գրպանի ժամացույցն է, և տեղեկացրել պատմական հուշարձանների և պարկերի ծառայությանը։

Այնուհետև գործում ներգրավվել է ՀԴԲ-ն՝ պարզելու համար, թե արդյոք ժամացույցը գողացվել է նախկին նախագահից 1987 թվականին:

Ժամացույցը, որը ՀԴԲ-ի կողմից նկարագրված է որպես Waltham 17 jewel, հինգշաբթի օրը վերադարձվել է Նյու Յորք, որպեսզի տեղադրվի Սագամոր-Հիլ ազգային պատմական կենտրոնում գտնվող Ռուզվելտի տանը, որպեսզի հանրությունը հաջորդ երեք ամսվա ընթացքում կարողանա տեսնել այն:

Այդպես էլ չի պարզվել, թե ով է գողացել ժամացույցը ցուցափեղկից, կամ ինչպես է այն հայտնվել Ֆլորիդայում, հայտնում է պարկերի ծառայությունը։

Աղբյուրը՝ news.am