Լրագրողների հետ հանդիպման ժամանակ ԱԺ ՀՀԿ խմբակցության պատգամավոր Ռաֆիկ Պետրոսյանն անդրադառնալով «Բյուջե–2012»–ի նախագծին՝ ասել է, որ իրենց գնահատականը բյուջեի վերաբերյալ հենվում է կառավարության ներկայացրած բյուջեի նախագծի վրա:

–Բյուջեն մենք գնահատում ենք դրական և քվեարկելու ենք բյուջեի օգտին: Այն իրատեսական, սոցիալական է, որովհետև 43 մլրդ դրամ ավելի է ծախսվելու սոցիալական հարցերի վրա: Համարում ենք իրատեսական այն առումով, որ կառավարությունը 101 մլրդ–ի պատասխանատվություն է վերցնում իր վրա հարկերի հավաքագրման հաշվին: Բյուջեին իսկապես հնարավոր է ավելացնել 101 մլրդ և գուցե ավելի,–ասել է նա։

Ըստ Ռաֆիկ Պետրոսյանի՝ բյուջեն այն է, ինչ ունենք:

–Ավելին պահանջվում է ընդդիմության կողմից, բայց ինչ ունենք՝ ունենք: ՀՅԴ–ն բարձրացրեց նվազագույն աշխատավարձն ավելացնելու հարցը, բայց քննարկումները ցույց տվեցին, որ դա հնարավոր չէ: Դա ՀՅԴ կողմից նախընտրական քայլ էր, մենք էլ, «Ժառանգությունն» էլ մեծ ուրախությամբ կընդունեինք դա, եթե հնարավոր լիներ: Բնական է՝ ընդդիմությունը պետք է քննադատի,–ընդգծել  է նա։

Իսկ ասուլիսին ներկա ԱԺ «Ժառանգություն» խմբակցության քարտուղար Լարիսա Ալավերդյանն էլ ասել է, թե հարցն այն է, որ երբ լսում ես կառավարության անդամներին, կարծես հանճարների ակումբ լինի:

–Ձեր հանճարը մեր բանջարին վնաս է: Կառավարությունը չի կատարել իր իսկ կողմից ներկայացրած ծրագիրը: Կարևորագույն քաղաքական առաջարկը եղել է հետևյալը՝ հնարավոր չէ իշխանությունն առանց ընդդիմության առաջարկների հաղթահարի խնդիրները,–ասել է նա։

Ըստ Լարիսա Ալավերդյանի՝  Հայաստանի կառավարման համակարգը բարոյական, տնտեսական և ֆինանսական խոր ճգնաժամի մեջ է:

–20 տարի իրար փոխարինելով՝ իշխանությունները չեն փոփոխում սկզբից դրված օլիգոպոլիայի վրա հիմնվածը,–ընդգծել է նա:

Ռաֆիկ Պետրոսյանն էլ պատասխանել է՝ որպեսզի հասկանանք՝ ինչու նախընտրական խոստումներն իշխանությունը կամ նախագահը չեն կատարել, չպետք է մոռանանք, որ պատճառը տնտեսական ճգնաժամն է։