Քուվեյթում ընդդիմության մի քանի տասնյակ ներկայացուցիչներ մայրաքաղաք Էլ–Քուվեյթում տեղի ունեցող բողոքի գործողությունների ժամանակ ներխուժել են երկրի խորհրդարան։ «Ալ–Ջազիրա» հեռուստաալիքը հայտնում է, որ այս գործողությունը գլխավորել է ոմն Մուսալեմ ալ–Բարաք, ով կարողացել է մի քանի քաղաքական գործիչների և երիտասարդական կազմակերպությունների առաջնորդների հետ միասին մտնել ազգային ժողովի շենք։

Ցուցարարներին հաջողվել է բացել խորհրդարանի դարպասները և ներս մտնել նիստերի դահլիճ։ Այնտեղ ընդդիմադիրները կատարել են Քուվեյթի ազգային օրհներգը։ Բողոքի գործողությունների մասնակիցների հիմնական պահանջները խորհրդարանը ցրելն է և վարչապետի հրաժարականը։

«Մենք չենք պատրաստվում մեր երկիրը հանձնել հանցագործ խմբավորման։ Մենք արտահերթ ընտրություններ ենք պահանջում»,–հայտարարել է Քուվեյթի խորհրդարանի նախկին անդամը։