Այսօր՝ Աժ հայտարարությունների ժամին, «Ժառանգություն» կուսակցության պատգամավոր Զարուհի Փոստանջյանը հայտարարել է, որ ՀՀ–ում գրանցվող անոմալ ծնունդների, չբերությունների, վիժումների ցուցանիշները, ինչպես նաև օդում, հողում, ջրում, սննդամթերքում և մարդկանց օրգանիզմում ծանր մետաղների և այլ նյութերի առկայությունը մի քանի անգամ գերազանցում են թույլատրելի նորմերը։ Այս ամենի համար նա մեղադրել է կառավարությանը՝ քննադատելով վերջինիս գործողություններն առ այն, որ հանքավայրերը շահագործելու համար մի շարք ընկերությունների տրամադրվել են արտոնագրեր, որոնք երկրի ընդերքի շահագործումն իրականացնում են՝ վնասելով շրջակա միջավայրին։

–Ինչպե՞ս կարելի է պետության տնտեսությունը կառուցել հանքերի գիշատչական շահագործմամբ և դրանով ցույց տալ՝ իբր աշխատատեղեր են ստեղծվում։ Այս ամենի հետևանքով տուժում է ոչ միայն շրջակա միջավայրը, որն աղետալի ազդեցություն է կրում, այլև ՀՀ տնտեսությունը,– հայտարարել է Փոստանջյանը՝ պարզաբանելով, որ տնտեսությունը չպետք է հիմնվի լոկ բնական ռեսուրսների «գիշատիչ» շահագործման վրա։

7or.am