Հայ ուսանողները նեղել են Կանադայում Թուրքիայի դեսպանին

● Լրահոս

10.11.2011 ● 13:22

Հայ ուսանողները նեղել են Կանադայում Թուրքիայի դեսպանին

Նոյեմբերի 9-ին ԱՄՆ Թաֆթսի համալսարանի Ֆլետչերի դիվանագիտության և իրավունքի դպրոցում դասախոսությամբ հանդես եկավ Կանադայում Թուրքիայի արտակարգ և լիազոր դեսպան Ռաֆետ Աքգյունայը, ով նախկինում զբաղեցրել է Թուրքիայի վարչապետ Ռեջեփ Թայիփ Էրդողանի արտաքին քաղաքական հարցերով գլխավոր խորհրդականի պաշտոնը։

Դեսպան Աքգյունայը, չնայած այն հանգամանքին, որ դասախոսությունը վերնագրված էր «Թուրքիան և Մերձավոր Արևելքը», լայնորեն անդրադարձավ հայ-թուրքական հարաբերությունների արդի փուլին։ Մասնավորապես նա նշեց, որ հայ-թուրքական արձանագրությունների վավերացումն առկախված է այն պատճառով, որ պաշտոնական Երևանը խնդիրներ ունի ինչպես երկրի ներսում, այնպես էլ սփյուռքի հետ և չի կարողանում քաղաքական կամք դրսևորել վավերացնելու արձանագրությունները։

Դասախոսությանը ներկա հայ ուսանողները թուրք դեսպանին հիշեցրեցին, որ ԱՄՆ պետքարտուղարը, ինչպես նաև միջազգային հանրության այլ ներկայացուցիչներ բազմիցս նշել են, որ գնդակը թուրքական դաշտում է, և կարիք չկա փորձել ապակողմնորոշել լսարանին։ Հայ ուսանողների կողմից նաև նշվեց Թուրքիայի կողմից Հայոց Ցեղասպանության ժխտմանն ուղղված քայլերի մասին, որին թուրք դեսպանը չկարողացավ պատասխան գտնել։

Ուսանողներն ընդգծեցին նաև Աքգյունայի կողմից այդքան գովազդված «տարածաշրջանայիան համագործակցության և հարևանների հետ զրո խնդիրների քաղաքականության» սնանկությունը և փաստացի վերածումը «շատ շատ խնդիրներ հարևանների հետ» քաղաքականության, հարցնելով՝ թե ով է պատասխանատու ռազմավարության և քաղաքականության միջև նման շեղման համար։ Աքգյունայը, ընդունելով, որ դա ճիշտ է, սկսեց շփոթված պատասխանել ու արդարացումներ փնտրել, ինչը կրկին ներկաների աչքում սասանեց նրա դասախոսության առանցքը։

Ֆլետչերի դիվանագիտության և իրավունքի դպրոցը հիմնադրվել է 1933թ. և հանդիսանում է ԱՄՆ-ի և ամբողջ աշխարհի առաջատար դիվանագիտական դպրոցներից մեկը։