Ճարտարապետների միության նախագահ Մկրտիչ Մինասյանն այսօր մամուլի ասուլիսի ժամանակ հայտարարել է, որ «Հրազդան» մարզադաշտի տարածքում առևտրի կենտրոն կառուցելը հղի է վտանգներով:

–Առևտրի կենտրոնը գտնվելու է էվակուացիոն դաշտի հատվածում, ինչը մարդկանց անվտանգ տարհանման դեպքում լուրջ անհարմարություններ է առաջացնելու: Մենք շարունակելու ենք մեր պայքարը՝ ուղղված տարածքը նպատակային օգտագործելուն: Մենք առայժմ հարցումներ ենք ուղարկել, սակայն պատասխաններ դեռևս չենք ստացել: Փաստորեն, այդ տարածքի հողի ապօրինի փոփոխություն է տեղի ունեցել: Եթե սեփականատեր Աշոտ Աղաբաբյանն այնտեղ առևտրի կենտրոն կառուցելու իրավունք է ստացել, ապա վաղը, ասենք, հյուրանոց կառուցելու թույլտվություն կստանա,-ասել է Ճարտարապետների միության նախագահը։

Նրա հետ համաձայնել է նաև «Հրազդան» մարզադաշտի նախագծի հեղինակ, ճարտարապետ Գուրգեն Մուշեղյանը։

–ԱԻՆ-ը ևս իր եզրակացության մեջ նշել է, որ նման առևտրի կենտրոնի կառուցումն անթույլատրելի է: Անգամ ավտոկանգառները պետք է կառուցվեն մարզադաշտերից առնվազն 600մ հեռավորության վրա,–ասել է Գ. Մուշեղյանը:

7or.am