Այսօր Շիրակի մրցունակության կենտրոնում ՓՄՁ հիմնադրամ ոչ առևտրային կազմակերպության ղեկավարն ու տեսչական բարեփոխումները համակարգող աշխատանքային խմբի ղեկավարը գյումրեցի գործարարներին ու հաշվապահներին են ներկայացրել ստուգումների կազմակերպման և անցկացման մասին  ՀՀ օրենքում կատարված փոփոխությունները: Գործարարներն ու հաշվապահները հանդիպման ընթացքում բուռն դժգոհություններ են հայտնել վարվող տնտեսական քաղաքականությունից և պետության կողմից բիզնեսին ցուցաբերվող վերաբերմունքից: Հաշվապահ Ալբերտ Մարտիրոսյանը հանդիպման ժամանակ անդրադարձել է կառավարության գործունեությանը՝ նշելով, որ չնայած կառավարությունը բարեփոխումների մասին է խոսում, այդ բարեփոխումների շատ չնչին մասն է իրականություն դառնում. մնացածը մնում է թղթի վրա:

«Աշխարհին ու ժողովրդին համոզում ենք, որ գիտե՞ք, բարեփոխում ենք անում: Ի՞նչն ես բարեփոխում: Պետությունը հիմք պետք է ունենա, որ բարեփոխես: Այսօրվա բիզնեսի բարեփոխման մասին խոսելն անտրամաբանական է, նյութ չկա բարեփոխելու, բիզնես չկա: Ուժային մեթոդներով հետապնդվող, խոցելի բիզնես ունենք: Նույնիսկ խոցելի է այն օլիգարխը, որը միլիարդներ ունի, այդ մարդն ավելի խոցելի է, քան այն «բուտկի» տերը: Շատ–շատ այդ բուտկա ունեցողը փակի ու գնա, օլիգարխը չի կարող դա անել: Մեր տնտեսությունը վերից վար խոցելի է, հիմքն է պետք փոխել, իմիտացիան պետք է վերացնել: Ինչքան ուզում է՝ «Գրանդ» տան, ինչքան ուզում է՝ օրենք փոխեն, եթե երկրի հիմքը չի փոխվում, արդյունք չկա»- ասել է Ալբերտ Մարտիրոսյանը:

Դերենիկ Մալխասյան

Գյումրի