ՆԱՏՕ–ի գլխավոր քարտուղար Անդերս Ֆոգ Ռասմուսենը հայտարարել է, թե Հյուսիսատլանտյան դաշինքը մտադիր չէ միջամտել Իրանի գործերին։

«ՆԱՏՕ–ն որևէ մտադրություն չունի միջամտել Իրանի գործերին։ Որպես դաշինք ՆԱՏՕ–ն ներգրավված չէ իրանական հարցում»,–ասել է Ռասմուսենը։

Նրա խոսքերով՝ ՆԱՏՕ–ն պաշտպանում է քաղաքա–դիվանագիտական ճանապարհով իրանական միջուկային խնդրի կարգավորման միջազգային հանրության ջանքերը։ «Ես Իրանի ղեկավարությանը կոչ եմ անում կատարել ՄԱԿ–ի Անվտանգության խորհրդի համապատասխան բանաձևերը և դադարեցնել ուրանի հարստացման ծրագիրը»,–նշել է ՆԱՏՕ–ի գլխավոր քարտուղարը։

ԱՄՆ–ը և արևմտյան մի շարք երկրներ Իրանին մեղադրում են խաղաղ միջուկային էներգիայի ծրագրի քողի տակ միջուկային զենք մշակելու համար։ Թեհրանը հրաժարվում է բոլոր մեղադրանքներից՝ հայտարարելով, թե իր միջուկային ծրագիրն ուղղված է բացառապես էլեկտրաէներգիայի սեփական պահանջմունքը բավարարելուն։