Հմայակ Հովհաննիսյան. «Վարչակազմն առաջիկայում լավ օրեր չի կանխատեսում, և սրացումներ են սպասվում»

● Լրահոս

03.11.2011 ● 12:51

Հմայակ Հովհաննիսյան. «Վարչակազմն առաջիկայում լավ օրեր չի կանխատեսում, և սրացումներ են սպասվում»

«Քաղաքագետների միության» նախագահ Հմայակ Հովհաննիսյանն անդրադառնալով ՀՀ ներքաղաքական խնդիրներին՝ ասել է, որ մեզանում ամեն ինչ հանգում է «ռազբորկաների»։

–Այս վարչակարգն ինքն իրեն մսխելու գործընթացի մեջ է հայտնվել, և այդ ընթացքը շարունակվելու է։ Տեսե՛ք, Գագիկ Բեգլարյանին երեկ հանեցին, իսկ այսօր խոսում են նրա վերադարձի մասին։ Լա՛վ, ինչո՞ւ էիք հանում, որ հիմա էլ բերեք. չափանիշը ո՞րն է, ի՞նչ պատճառաբանությամբ։ Ի՞նչ նպատակ է դրվում այդ տեղաշարժերի հիմքում,–ասել է նա։

Անդրադառնալով ոստիկանապետի պաշտոնում Վլադիմիր Գասպարայանի՝ Ալիկ Սարգսյանին փոխարինելու փաստին՝ նա ասել է, որ սպասվում են սրացումներ։

–Վլադիմիր Գասպարյանը կոշտ մեթոդներով աշխատող, կոշտ վարչարարության կողմնակից գործիչ է։ Դա հաշվի առնելով՝ կարելի է ենթադրել, որ վարչակազմն առաջիկայում լավ օրեր չի կանխատեսում, և սրացումներ են սպասվում։ Հաշվի առնելով այն, որ ոստիկանությունն արմատական ընդդիմության միակ զսպող օղակն է, այս փոփոխությունը միանգամայն տրամաբանական է,–ասել է նա։

Ըստ Հմայակ Հովհաննիսյանի՝ ամենավատ վիճակն այսօր Հայաստանում է։

–Չնայած վարչապետի այն կանխատեսումներին, որ Հայաստանը չի հայտնվի ճգնաժամի հորձանուտում, ամենաուժգին հարվածը Հայաստանում եղավ, ամենածանրն այստեղ եղավ,–ասել է նա։