Հարցազրույց  ԱԺ «Ժառանգություն» խմբակցության քարտուղար Լարիսա Ալավերդյանի հետ

-Ինչպե՞ս եք գնահատում ապրիլի 22-ին հայ-թուրքական շրջանակային համաձայնագրի  ստորագրումը։

-Այսպես կոչված «ճանապարհային քարտեզը» ես անվանել եմ «карта бездорожья»: Պետք է ասեմ, որ համաձայնագրի անվանումը, թեկուզ պաշտոնական անվանումը, բովանդակությունն ու դրա վերաբերյալ արվող մեկնաբանությունները ուղղակի իրար չեն համապատասխանում։

-Այսի՞նքն։

-Փաստաթուղթն ունի անվանում, դրանում  նշվում են երկու կողմերը՝ Հայաստան, Թուրքիա, հետո այն անվանվում է «Ճանապարհային քարտեզ» և ասվում, որ դրանում համապարփակ շրջանակներում կա համաձայնություն...Հետագայում դրանց վերաբերյալ արված պաշտոնական հայտարարություններն ու մեկնաբանությունները միմյանց չեն համապատասխանում։

-Երեկ հանդիպել եք ՀՀ արտգործնախարարի հետ։ Հանդիպման արդյունքում Ձեր տագնապները փարատվեցի՞ն, թե՞  ոչ։

-Ո՛չ։ Հակառակը՝  դրանք ավելի խորացան։ Քանի որ հանդիպումը եղել է ոչ հրապարակային՝ ես կասեմ միայն, որ այն մեր մտահոգությունները, որոնք որ հնչեցվել են «Ժառանգություն» խմբակցության պատգամավորների կողմից՝ չփարատվեցին։ Մենք ստացանք հստակ բացասական իմպուլս։ Դա ավելի է մտահոգում, սակայն դա ոչ թե հիասթափության, այլ ակտիվ գործունեություն ծավալելու  ազդակ է մեզ համար։

-Թուրքական ԶԼՄ-ները արդեն նշել են ստորագրված համաձայնագրի բովանդակության մասին։ Արտգործնախարարի հետ հանդիպման ժամանակ խմբակցությանը ներկայացվե՞լ են դրանում ներառված կետերը։

-Մենք առաջիններից ենք եղել, որ պահանջել ենք գաղտանզերծել համաձայնագրի բովանդակությունը։ Երեկ տրվեց անորոշ խոստում, որ մոտակա ժամանակներում դա կարվի։  Եվ այս իմաստով եմ ասում, որ կա անհամապատասխանություն։ Եթե դա կողմերի միջև է ստորագրված, ապա նշանակում է, որ երկու երկրների հասարակությունները առնվազն փաստաթղթի սկզբունքների մասին պետք է ուղղակի իմանան։ Ասեմ, որ ոչ պաշտոնական մեկնաբանությունները ևս եղել են հակասական։ Հետաքրքիր է, որ միշտ ասելով, թե մենք վարում ենք ազգային, պետական- քաղաքականություն՝ մեր իշխանություններն անընդհատ խոսում են դրսի արձագանքի մասին, այսինքն, թե ինչպիսի դրական գնահատականների են արժանացել դրսում։

-Ի՞նչ եք կարծում, փաստաթղթում արտացոլվա՞ծ են Թուրքիայի նախապայմանները, թե՞ ոչ։

-Ես կարծում եմ, որ սա «թուրքական մարշ» էր։ Ես խնդիր չունեմ մեղադրանքներով  հանդես գալու, սակայն կարծում եմ, որ լավագույն դեպքերում, այս համաձայնագրի ստորագրումը բարեխիղճ մոլորություն էր։

-Ինչպե՞ս եք գնահատում Հայ Հեղափոխական Դաշնակցության դուրս գալը կոալիցիայից։

-Դաշնակցությունը գործող, եթե չասեմ միակ, ապա եզակի, ավանդական կուսակցություններից մեկն է։ Այստեղ մեծ դեր խաղացին անզիջելի ազգային սկզբունքները։ Կարծում եմ, որ այս քայլը անկեղծ էր և կապ չունի ինչ-ինչ խաղերի հետ։

-Ինչպե՞ս եք գնահատում ԱԺ նախագահի այսօրվա կոչը ՀՅԴ խմբակցությանը՝  հետ վերցնել հանձնաժողովի նախագահներ Արմեն Ռուստամյանի և Արթուր Աղաբեկյանի հրաժարականի մասին դիմումները:

-Գնահատում եմ, որպես կոալիցիայի անսկզբունքայնություն։

-Հաշվի առնելով ներկայիս արտաքին մարտահրավերները՝ որքանո՞վ եք հնարավոր համարում ՀՅԴ-«Ժառանգություն» համագործակցությունը։

-Դուք գիտեք «Ժառանգության» դիրքորոշումը՝ չբացառել համագործակցություն այն դաշտում, որը պետք է ծառայի ազգային, պետական, հասարակական, մարդու շահերին։ Եթե այստեղ տեսնենք, որ այն հարցերում, որոնք նպաստում են ազգի, պետության շահերին և իրավական պետության կայացմանը և որոնք չեն շեղվում մեր ուղենիշներից, ապա համագործակցությունը հնարավոր է մեզ համար։

-Իսկ հնարավո՞ր է,  որ «Ժառանգությունը»  վերանայի իր որոշումը՝ առաջիկա քաղաքապետի ընտրություններում սատարել Հայ ազգային կոնգրեսին և միանա ՀՅԴ-ին։

-«Ժառանգությունը» չունի այն որոշումը, որի մասին Դուք ասում եք։ Կուսակցությունը հայտարարել է, որ կսատարի ընդդիմությանը։ Կոչ է արվել ձայները տալ ընդդիմությանը։  Մեր այդ կոչում, ինչպես գիտեք,  չկան անուններ, կա «ընդդիմությանը ձայն տալ» ձևակերպումը։

-Այսինքն չի՞  բացառվում ՀՅԴ-ին սատարելը։

-Ես չեմ կարող ասել։ Կուսակցության անունից ես երբևէ մեկնաբանություններով հանդես չեմ գալիս։

Զրույցը վարեց Վախթանգ Մարգարյանը