Ինչպես արդեն տեղեկացրել էինք, Երևանի քաղաքապետ Կարեն Կարապետյանը հայտարարել էր իր հրաժարականի մասին։

«7օր»–ը «Ժառանգություն» կուսակցության պատգամավոր Արմեն Մարտիրոսյանից փորձել է ճշտել՝ ինչպես է նա վերաբերվում Կ. Կարապետյանի հրաժարականի որոշմանը։

Մեզ հետ զրույցում նա նշել է, որ, իր կարծիքով, Կարեն Կարապետյանն իրավունք ունի դիմում գրել և դուրս գալ աշխատանքից անձնական դրդապատճառներով։

–Եթե նույնիսկ այլ դրդապատճառներ լինեն, դրանք ներիշխանական են լինելու բացառապես, և ես չեմ կարծում, որ մենք կարիք ունենք ներիշխանական հարաբերությունների ճշտումները մեկնաբանել։ Ես չեմ կարծում՝ սա, այսպես ասեմ, հասարակական խնդիրների հետ կապված է եղել, որ ես մեկնաբանեմ,–ասել է նա։

Հարցին՝ ո՞ւմ կցանկանար նա տեսնել ապագա քաղաքապետի պաշտոնում, Արմեն Մարտիրոսյանը պատասխանել է՝ փոխքաղաքապետ Տարոն Մարգարյանին։

–Ինքը կկարողանա համապատասխան աշխատանքներ կատարել. փորձ ունի, երիտասարդ ավյունը կա, կարծում եմ՝ ինքը կկարողանա, և քանի որ  քաղաքականապես ակտիվ անձնավորություն է, նաև որոշակիորոն քաղաքական գործիչ է, կարծում եմ՝ խնդիրներ էլ  պետք է որ չստեղծվեն,–նշել է նա։

7or.am