Ռուսաստանի Դաշնության փոխվարչապետ Ալեքսեյ Օվերչուկը Սամարղանդում 16-րդ Վերոնայի Եվրասիական տնտեսական համաժողովի շրջանակներում մեկնաբանել է Ռուսաստանի, Հայաստանի և Ադրբեջանի եռակողմ աշխատանքային խմբերի աշխատանքը՝ տրանսպորտային կապերի ապաշրջափակման և սահմանազատման վերաբերյալ։

«Հայաստանի և Ադրբեջանի միջև սահմանազատումը երկկողմանի խնդիր է։ Իսկ համանախագահները Հայաստանի և Ադրբեջանի կառավարությունների փոխվարչապետերն են։ Ինչ վերաբերում է այս գործընթացում Ռուսաստանի Դաշնության մասնակցությանը և դերին, ապա մենք միշտ պատրաստ ենք աջակցություն ցուցաբերել։ Մենք միշտ պատրաստ ենք աջակցել և տրամադրել փաստաթղթեր, ներառյալ քարտեզագրական փաստաթղթերը, որոնք պատմականորեն գոյություն ունեն Ռուսաստանում:

Ինչ վերաբերում է տրանսպորտային կապի ապաշրջափակմանը, ապա ֆորմալ առումով կա աշխատանքային խումբ։ Վերջին անգամ հավաքվել էինք հունիսի 2-ին։ Մեղրիով երկաթուղու շինարարության մեկնարկի վերաբերյալ համատեղ հայտարարության տեքստը նույնպես մեծ մասամբ պատրաստ է։

Ինչ վերաբերում է բուն ճանապարհի կառուցմանը, ապա գիտեք, որ Ադրբեջանն արդեն սկսել է Իրանի տարածքով ավտոմայրուղու շինարարությունը՝ շրջանցելով Հայաստանի տարածքը։ Ինչպես գիտենք, հուշագիր է ստորագրվել նաև Ադրբեջանի Հանրապետության և Իրանի Իսլամական Հանրապետության միջև Իրանի տարածքով Հայաստանի տարածքը շրջանցող երկաթուղու կառուցման վերաբերյալ»,-ասել է Օվերչուկը՝ պատասխանելով Alpha News-ի հարցին։

Նա նաև մեկնաբանել է Հայաստանում Հյուսիս-Հարավ ավտոմայրուղու կառուցումը.

«Սա շատ կարևոր ենթակառուցվածքային ծրագիր է, որը Իրանից Հայաստանի տարածքով կհասնի Վրաստան։ Եվ, իհարկե, հաշվի առնելով Վերին Լարսը՝ այն նույնպես շատ կարևոր դեր կունենա մեր Հյուսիս-Հարավ միջանցքում։ Մենք վստահ ենք դրանում»,-նշել է ՌԴ փոխվարչապետը։